Sámedikki nuoraid kultur-ja valáštallanstipeandda ožžot Ole Mathis Sara Nedrejord, Aslak Ole Eira, Ina-Theres Andrea Sparrok, Sarakka Gaup ja Anne Maia Raanes Sørensen
Sámedikki kultur- ja valáštallanstipeanda galgá movttiidahttit sámi nuoraid bargat musihkain, dáidagiin, kultuvrrain ja valáštallamiin. Sámediggi juohká vihtta 25 000 ruvdnosaš stipeandda, ja dat juhkkojuvvojit ohcamiid vuođul.
Sámediggeráđđi Henrik Olsen dadjá ahte son lea hui sakka jierásmuvvan go ohcciid doaimmat fátmmastit nu viidát.
-Mun háliidan dadjat ahte sámi kultur- ja valáštallaneallimis lea buorre boahtteáigi go ledje nu ollu ohccit ja buorre kvalitehta. Mis lei hui váttis válljet vihttasa sin gaskkas, dadjá sámediggeráđđi Henrik Olsen.
Valáštallanstipeanda:
Ole Mathis Sara Nedrejord lea njuikejeaddji ja lea olahan buriid bohtosiid sihke nationála ja riikkaidgaskasaš dásis. Diimmá njuikenáigodagas lei son riikka nubbin buoremus juniornjuikejeaddji.
Aslak Ole Eira lea guhkesmátki čuoigi, ja vázzá dál Ráissa čuoiganjoatkkaskuvllas. Sus ledje buorit bohtosat Artic Winter Games gilvvuin ja máŋgga eará meašttirčuoigamiin.
Kulturstipeanda:
Ina-Theres Andrea Sparrok lea govvideaddji. Son lea duođaštan máttasámi boazodoalu buori ja ealli vuogi mielde. Govaid ja teavsttaid bokte juohká son máhtu maiddái sámi giela ja kultuvrra birra, ja movttiidahttá sámi nuoraid ge beroštit govvendáidagis.
Sarakka Gaup lea neavttár. Teáhterdáidaga bokte lea son juo gártadan alccesis guhkes ja juohkelágan vásihusaid. Gaup čájeha lávdedáidagis bokte ahte sámi kulturgaskkusteapmi guoskkaha. Ferte leat duostil ja geavahit buot searaid dáidagii go galgá lihkostuvvat, ja son doaibmá nuorra sámiid jietnan geat leat ohcamin gullevašvuođa ja ruohttasiiddiset.
Anne Maia Raanes Sørensen lea baleahttadánsu. Son álggahii juo gávcci jahkásažžan karrieara baleahttadánsumis. Sámi kultuvrra sáhttá maiddái dánssa bokte čuvget ja buktit oidnosii. Sus lea nana háliidus dánsut, ja háliida leat mielde čájeheamen eará sámi nuoraide ahte dánsumii sáhttá maiddái leat sadji sámi kulturgaskkusteamis. Son lea oahppamin baleahta Kanadas. Raanes Sørensen álgá fidnooahppin ámmátlaš baleahtta kompaniijas, Coastal City Ballet.
Sámediggeráđđi Henrik Olsen dadjá ahte stipeandaoažžut leat buohkat buorrin ovdagovvan sámi nuoraide ja leat sin ambassadevrrat go háliidit áŋgiruššat valáštallamiin ja kultuvrrain.
Eanet dieđut: Sámediggeráđđi Henrik Olsen, 907 75 219