Sámediggeráđđi Silje Karine Muotka ii leat duhtavaš dainna go Birasdirektoráhta lea addán Nussir ASA:i luoitinlobi Riehppovutnii. – Lean cealkán ahte dát lea máilmmimeašttirgilvvohallan fuollameahttunvuođas, ja dat dakkár válddahus maid mun doarjjun ollásit, dadjá Silje Karine Muotka.
Sámediggeráđi árvvoštallan lea ahte Birasdirektoráhta ii leat buktán ovdan daid negatiiva biraslaš váikkuhusaid. Ráđđi eahpida maid dan servodatekonomalaš árvvoštallama mii dahkkojuvvo ja oaivvilda ahte eai álgoálbmotvuoigatvuođat ge leat doarvái bures vuhtiiváldojuvvon dáin árvvoštallamiin.
- Mun oaivvildan ahte dát álggaha guhkes barggu sihke birasvuhtiiváldima ektui ja dan ektui ahte sámi beroštusat vuhtiiváldojuvvojit riikkaidgaskasaš geatnegasvuođaid vuođul. Mii álggahit dainna ahte sáddet váidaga luoitinlohpái, ja joatkit dainna ahte ovddidit ášši Nussira birra Sámedikki njukčamánu dievasčoahkkimii. Háliidan oažžut nana mearrádusa Sámedikkis, dadjá Muotka.
Sámediggeráđđi áigu čađahit čuovvovaš proseassa Nussir-áššis lagas boahtteáiggis:
- Jáhkán ain ahte váldá guhkes áiggi ovdal loahpalaš mearrádusa dahkkojuvvo Nussir-áššis, ja doppe leat máŋga formálalaš áššemeannudangeainnu prošeakta ferte čađa ovdal luoitinlobi duohtandahkama, dadjá Muotka.
(Silje Karine Muotka jođiha Sámediggeráđi barggu Nussir-áššiin. Sámedikki presideanta Aili Keskitalo lea dieđihan ahte son lea bealálaš áššis go su oappás lea eaiggátvuohta fitnodaga vuolleskáhppojeaddjái. Bealátvuođaárvvoštallama sáhtát lohkat dás).