Sámedikki plánaveahkki

Sámedikki geatnegasvuohta searvat plánemii mearkkaša maiddái ahte Sámediggi lága mielde sáhttá vuosttaldit areálaplánaid ja loktet guovlulaš plánaid departementii jus leat áššit mat sakka váikkuhit sámi kultuvrra ja ealáhusdoaimma eaige leat doarvái bures vuhtiiváldon (vrd. §§ 5-4 ja 8-4). Dát láhkamearrádusaid vuođul lea dárbbašlaš ahte Sámediggi čielggada man vuođu mielde sii servet plánenbargui.

Sámedikki plánaveahki veahkeha vuogáidahttimis ja čohkkemis dieđuid das makkár sámi kultuvrra beroštumit galget vuhtiiváldojuvvot, mat čuvvot gustovaš ja riikkaidgaskasaš rievtti ja mat leat áigeguovdilat plánemiidda plána- ja huksenlága mielde. Plánaveahkki sisdoallu lea nu ahte das leat veahkkečuoggát dahje njuolggadusat oktan dievaslaš mearkkašumiiguin. Finnmárkolága § 4 mielde mearrida Sámediggi njuolggadusaid meahcceeatnamiid rievdaduvvon ávkkástallanvugiid várás (dás rájes gohčoduvvon meahcceeatnamiid rievdaduvvon ávkkástallanvugiid njuolggadusat). Njuolggadusaid lea departemeanta dohkkehan. Dán plánaveahkis lea eará áššálaš ja geográfalaš doaibmaguovlu go Finnmárkku meahcceeatnamiid rievdaduvvon ávkkástallanvugiid njuolggadusain. Das leat deattuhan dan go lea ovttavásttolašvuohta doaibmaguovllus, de lea maiddái áššálaš ovttavásttolašvuohta sisdoalus dán plánaveahki ja meahcceeatnamiid rievdaduvvon ávkkástallanvugiid njuolggadusa gaskkas.