Čájáhus Documenta lágiduvvo juohke viđat jagi, ja 2017:s lágiduvvo dat duiskalaš gávpoga Kassela ja greikkalaš oaivegávpoga Atena gaskka. Oktage sámi dáiddár ii leat ovdal čájehan bargguidis dán riikkaidgaskasaš čájáhusas.
– Dát lea stuorra ja historjjálaš dáhpáhus, dadjá Sámedikki presideanta Vibeke Larsen, gii lea mannamin «Documenta 14» rahpamii Kasselis Duiskaeatnamis.
– Hárvenaš dáhpáhus, dadjá Sámi dáiddaguovddáža direktevra, Jan Erik Lundström.
Deaŧalaš čájáhus
Documenta adnojuvvo leat okta deaŧaleamos ođđaáiggi dáiddadáhpáhusain, ja čájáhussii čájehit hui stuorra beroštumi sihke preassa, ámmátlaš bargit dáiddamáilmmis. Čájáhus mii bistá 100 beaivvi lágiduvvui maŋimuš 2012:s, ja dan gallededje dalle badjel 850.000 guossi. Lohku 14 čájeha ahte dat lágiduvvo 14. gearddi.
Lundström lea rámis go lea vejolašvuohta čájehit sámi dáidaga riikkaidgaskasaččat, ja lasiha dasto man deaŧalaš bovdejupmi lea dan ovttaskas 10 dáiddárii.
– Dát lea sámi dáidaga dohkkeheapmi ahte maiddái dat lea máilmmeviidosaš. Dieđusge lea dát maiddái hui deaŧalaš dáhpáhus ovttaskas dáiddára karrierii, dadjá Lundström.
Čájeha ahte riikkaidgaskasaččat lea sámi dáidagii stuorát beroštupmi go dáppe sámiid lagaš guovlluin.
Dáiddáriid gaskkas geat servet Kasselis ja Atenas leat Hans Ragnar Mathisen, Britta Marakatt-Labba, Synnøve Persen, Joar Nango ja Máret Ánne Sara. Dasa lassin leat maiddái Iver Jåks ja John Savio dáidagat mielde dán čájáhusas.
Sámedikki presideanta Vibeke Larsen lea Kasselis geassemánu 8. beaivvi rájes geassemánu 11. beaivvi rádjai.
Eanet dieđuid addá: Sámedikki presideanta Vibeke Larsen, tel 941 30 116