Språkprosjekter 2014-innvilget.xls 33,50 kB
Sámediggeráđđi lea meannudan doarjjaohcamiid 2014 giellaprošeavttaide. Dat mii dán jagi bođii fáhkka, lei go bohte ollu ohcamat applikašuvnnaid ráhkadeapmái sihke mobiltelefuvnnaide ja neahttabreahtaide. Dát mielddisbuktá ahte fargga leat ollu sámi applikašuvnnat olahahtti buohkaide. Dáinna lágiin sáhttá fargga vázzit sámegielain lummas.
- Sámediggeráđđi lea hui duhtavaš go juste dákkár prošeavttat biddjojit johtui. Applikašuvnnat leat olahanmuttus sihke mánáide, nuoraide ja rávisolbmuide, ja sáhttet leat buorre doarjjan sidjiide geat leat oahpahallame sámegiela, ja addá seammás sidjiide geain lea sámegiella ruovttugiellan, sámegielat molssaeavttu, lohká presideanta Aili Keskitalo.
Iešguđet lágan applikašuvnnaid buvttadeapmi lea lassánan ollu maŋimus jagiid, ja Sámediggeráđi mielas lea danin hui dehálaš ahte maiddái sámegielat applikašuvnnat čalmmustahttojuvvojit. Sámediggepresidentii Aili Keskitaloi lea dehálaš ahte sámegiella čuovvu áiggi, erenoamážit nuoraid váste lea dehálaš ahte sámegiela ovdáneapmi boahtá lunddolaččat dan bokte main nuorat beroštit.
- Mii fertet čuovvut ovdáneami, ja heivehit sámegielat fálaldagaid ođđaáigásaš máilbmái. Sámi applikašuvnnat leat mielde váikkuheame somás, oahpahalli, ja ii unnimusat, álkis vuogi háhkat oahpu sámegielas – dat han lea lummas.
Sámegiella gávpogiin ja giliin
Dán jagi ohcamat čájehit ahte lea stuora fokus doaibmabijuide mat nannejit sámegiela sihke giliin ja stuorit gávpogiin. Earret eará lea Álttá Sámi giellaguovddáš/ Alta samisk språksenter ožžon doarjaga lágidit easkkaálgi kurssaid sihke beaivet ja eahkes Lákkovuonbađas, Fálesnuoris ja Álttás. Sámiid viessu Oslos lea maid ožžon juolluduvvot doarjaga lágidit álgokurssa Oslos.
- Lea erenoamáš illudahtti oaidnit ahte gávpogat dego Oslo, Romsa ja Álttá garrasit áŋgiruššet sámegiela ovddas. Dát lea hui buorre ja addá ollu eanet vejolašvuođaid oahppat sámegiela, go sáhttet oažžut oahpu ruovttubáikkis, lohká Presideanta Aili Keskitalo
Oahppan doaimmaid ja stoahkama bokte
Giellaleairraide ja giellaarenaide leat maid ohcan doarjagiid, lassin applikašuvnnaid ráhkadeapmái ja giellakurssaide. Giellaarenat leat dehálaččat go lea oahppame giela ja addet ovttaskas olbmui vejolašvuođa geavahit giela olggobealde oahpahusa. Giellaleairrat mánáide ja nuoraide leat guhkit áigge čájehuvvon leat sihke beakkánat ja ávkkálaččat. Dáinna lágiin besset mánát ja nuorat čoahkkanit ja sosiála doaimmaid ja stoahkama bokte oahppat ja geavahit sámegiela.
Språkprosjekter 2014-innvilget.xls 33,50 kB