Sámegiella vuosttašgiellan
Sámegiella vuosttašgielas lea ohppiide geain lea sámegiella ruovttugiellan ja hupmet sámegiela go álget skuvlii. Oahppit geain lea sámegiella vuosttašgiellan ožžot álgo lohkan- ja čállinoahpahusa sámegillii. Dárogielfágas ožžot sii oahpahusa sierra dárogiel oahppoplána mielde mii lea ráhkaduvvon ohppiide geain lea sámegiella vuosttašgiellan. Sámegiella vuosttašgielas leat eanet diimmut ja stuorit gáibádusat go dárogielas.
Lei vejolaš válljet guokte vuosttašgiela, namalassii sihke sámegiela ja dárogiela vuosttašgiellan.
Sámegiella nubbingiellan – golbma iešguđet molssaeavttu
Ohppiin geain lea sámegiella nubbingiellan sáhttá leat iešguđet giellamáhttu go álget sámegieloahpahusain. Muhttimiidda lea sámegiella áibbas ođđa giella, earát fas máhttet veahá sámegiela go álget skuvlii. Lea maid iešguđetlágan dilli ohppiin iežaset lagasbirrasis das mii guoská vejolašvuohta beassat ovdánahttit sámegiela gullamiin ja beaivválaš geavahemiin. Dan dihte lea sámegiella nubbingiellan oahppoplána huksejuvvon nu ahte heive ohppiide geain leat iešguđet ovdamáhttu, ohppiide geain lea dárbu geavahit veahá guhkit áiggi oahppat giela, ja ohppiide geat álget sámegielain iešguđet jahkeceahkis.
Oahppit geain lea sámegiella nubbingiellan, sáhttet válljet oažžut loahppaárvvoštallama ja váldit loahpalaš eksámena vuođđoskuvllas ja joatkkaoahpahusas iešguđet molssaeavttuid mielde main eai leat seamma alla gáibádusat loahppagelbbolašvuođas dan golmma molssaeavttuin.
Sámegiella nubbingiellan fágas leat čuovvovaš molssaeavttu:
- Sámegiella nubbingiellan - sámegiella 2 lea dat molssaeaktu sámegiella nubbingielas mii addá buoremus giellagelbbolašvuođa. Dát molssaeaktu vuođđoskuvllas lea mielde bidjame vuođu oahppi doaibmi guovttegielalaš gelbbolašvuhtii.
- Sámegiella nubbingiellan - sámegiella 3 lea molssaeaktu ohppiide geaidda sáhttá leat ávkkálaš geavahit guhkit áiggi oahppat sámegiela ja ohppiide geat álget sámegielain loahpageahčen mánáidceahkis dahje álggogeahčen nuoraidskuvllas.
- Sámegiella nubbingiellan - sámegiella 4 lea fálaldat sámegielas easkaálgiide joatkkaoahpahusas ja dán eai sáhte válljet earát go oahppit geain ii leat leamaš sámegiella vuođđoskuvllas.
Oahppoplána gáibádusat sámegiella nubbingiellan fágas - sámegiella 2/ sámegiella 3/ sámegiella 4
Sámegiella nubbingiellan oahppoplána lea huksejuvvon nu ahte leat 9 dási. Oahppit geain lea sámegiella 2, galget máhttit buot 9 dási gelbbolašvuođamihttomeriid maŋŋel goalmmat jagi joatkkaoahpahusas, ja oahppit geain lea sámegiella 3 galget máhttit gelbbolašvuođamihttomeriid dásiide 1-6. Sii geain lea sámegiella 4, galget máhttit gelbbolašvuođamihttomeriid dásiide 1-3 maŋŋel Jo3.
| Sámegiella 2 | Sámegiella 3 | Sámegiella 4 |
Oahppit galget máhttit | Gelbbolašvuođa-mihttomeriid | Gelbbolašvuođa-mihttomeriid | Gelbbolašvuođa-mihttomeriid |
maŋŋel 7. jahkeceahki | dássi 1-3 m | dássi 1-2 m | Ii leat sámegiella vuođđoskuvllas |
maŋŋel 10. jahkeceahki | dássi 4-6 | dássi 1-3 | |
maŋŋel Jo 1 | dássi 7 | dássi 4 | dássi 1 |
maŋŋel Jo 2 | dássi 8 | dássi 5 | dássi 2 |
maŋŋel Jo 3 | dássi 9 | dássi 6 | dássi 3 |
Sámegiella vierisgiellan
Skuvlaeaiggát sáhttá fállat sámegiela vierisgiellan buot ohppiide nu go eará gielaid. Oahpahus addo de vierisgiela oahppoplána vuođul. Oahppit geain lea sámegiella vierisgiellan, eai leat luvvejuvvon čálalaš oahpahusas ja árvvoštallamis siidogielas.