Gieldda- ja ođasmahttinministtar Jan Tore Sannerja sámediggepresideanta Aili Keskitalo lohkaba ahte árgabeaivi šaddá álkit sámi álbmogii go oažžu sámi boallobeavddi jierbmetelefovnnaide. Odne almmuhuvvo boallobeavdi jierbmetelefovnnaide guđa sámegillii.
-Dál dahká teknologiija álkibun olu olbmuide geavahit sámegiela beaivválaš giellan, ja mun sávan ahte erenoamážit nuorat váldet atnui ođđa boallobeavddi, lohká gieldda- ja ođasmahttinministtar Jan Tore Sanner.
Sámegielas gávdnojit máŋga erenoamáš čállinmearkkat. Čállit sámegillii jierbmetelefovnnaiguin lea mielddisbuktán ahte ferte lonohallat máŋgga iešguđet lágan giellaboallobevddiid gaskka jus galggai gávdnat dáid iešguđet lágan sámegielbustávaid go čállá ovtta teavstta. Dát lea leamaš hui lossat.
Odne šaddet ođđa boallobeavddit olahanmuddui, mas leat sámegielbustávat, sihke Android- ja Iphonegeavaheddjiide. Boallobeavdi doarju buot sámegielaid mat leat anus Norggas odne, sihke davvisámegiela, lullisámegiela ja julevsámegiela. Dasa lassin sáhttá boallobeavddi geavahit go čállá nuortalašgillii, bihtánsámegillii ja anárašgillii. Boallobeavdi almmuhuvvo nuvttá Appan.
-Jierbmetelefovnnat šaddet ain deháleappot midjiide, sihke ruovttus ja barggus. Sámegiel boallobevddiin šaddá álkit gulahallat sámegillii. Dát lea buorre ovttaskas olbmui, ja sámi gielaid ovddideapmái, lohká sámediggepresideanta Aili Keskitalo.
Lea giellateknologalaš guovddáš Divvun Romssa universitehtas mii lea ráhkadan boallobeavddi. Sámi giellateknologiija guovddáš lea veahkehan ovdánahttinbargguin. Boallobeavddi sáhttet maid eará unnitlogugielagat geavahit.
-Divvun dahká hui dehálaš barggu ovddidit teknologalaš čovdosiid sámi gielaide, lohká Sanner.
Dieđut dan birra movt sáhtát viežžat boallobeavddi gávdnojit Divvuna neahttasiiddus. http://divvun.no/
Boallobeavddi samisk tastatur sáhtát viežžat nuvttá Google Playas otná rájes, ja Appstoras vuossargga 15.12.14. Dađistaga ođastuvvojit dát ođđa vejolašvuođaiguin – nu go sátnedivvumiin ja sániid ollásiidčállimiin.
Duogáš:
Divvun ovddida giellareaidduid nu go elektrovnnalaš lohkandárkkisteami, sátnedivvunreaiddu ja iešguđet lágan prográmmaid sámegielgeavaheddjiide. Fargga almmuha Divvun hállansyntesačovdosa davvisámegiela várás, mii dahká vejolažžan oažžut lohkkojuvvot sámegielteavsttaid neahttasiidduin.
Divvun-prošeakta álggahuvvui 2004:s ja ovttasbargá lahka Sámi giellateknologiija guovddážiin Romssa universitehtas. Prošeavtta ruhtada Gieldda- ja ođasmahttindepartemeanta, ja eaiggádat leat Sámediggi ja departemeanta.
Eanet dieđut: Sámediggepresideanta Aili Keskitalo, 971 29 305
