Evaluering av kunstneravtalen.pdf 593,71 kB
Norut Alta – Áltá lea árvvoštallan sámi dáiddáršiehtadusa. Šiehtadus evttoha ahte Sámediggi ja sámi dáiddárorganisašuvnnat berrejit árvvoštallat mii áššebeliid áigumuš lea dákkár šiehtadusain, maid sáhttá dahkat ovddidan dihtii dáidaga, ja sáhttá go ođđa šiehtadus, dálá dahje ođđa hámis, leat mielde ovddideamen sámi dáidaga.
Sámi dáiddárorganisašuvnnain ja Sámedikkis lea 8 jagi leamaš ovttasbargošiehtadus. Šiehtadussii gullá váldošiehtadus ja Dáiddáršiehtadus mii šiehtaduvvo jahkásaččat.
Árvvoštallama sisdoallu
Ođđa váldošiehtadus galgá šiehtaduvvot ja boahtit fápmui 2014 rájes. Ovdal dan háliidedje sámi dáiddárorganisašuvnnat ja Sámediggi dakkár árvvoštallama, mii guorahallá dáiddáršiehtadusa ávkki; - lea go dat leamaš mielde nannemin dáidaga ja dáiddáriid ovdánanvejolašvuođa sámi servodagas?
Dát lea 2004 ovttasbargošiehtadusa árvvoštallan ja áigodaga 2006-2011 dáiddáršiehtadusaid árvvoštallan. Jahkásaččat lea Dáiddáršiehtadusa bokte juolluduvvon gaskal 4 ja 6 miljon ruvnnu.
6 sierranas ortnega
Árvvoštallanáigodagas (2006-2011) leat šiehtadusas leamaš 6 sierranas ortnega:
Deaŧalaš muhto doaimmaheapme
Árvvoštallan čájeha ahte dáiddáršiehtadusas lea leamaš hui stuorra mearkkašupmi dasa ahte leat biddjojuvvon muhtun bistevaš ekonomalaš rámmat ja ortnegat sámi dáidaga várás.
Šiehtadus lea addán dáiddáriidda ja sin organisašuvnnaide einnostanvejolašvuođa mii lea dahkan vejolažžan plánet guhkit áiggi áŋgiruššamiid.
Dattetge orru Dáiddáršiehtadus leamen dakkár “seailudanreaidu” mii addá uhccán ovddidanvejolašvuođa sámi dáidagii, čállá Norut árvvoštallanraporttastis. Sivvan dasa lea earret eará dat ahte šiehttadallandilis váilu ekonomalaš doaibmanvejolašvuohta go Sámediggi buori muddui ovdal šiehtadallamiid lea mearridan šiehtadallamiid ekonomalaš rámmaid.
Háliidit eanet konkrehta ulbmiliid
Máŋga informántta jearahit višuvnna ja muhtumat eanet konkrehta ulbmiliid šiehtadussii. Sii háliidit guđe guvlui sámi dáidda lea ovdáneamen ja goas dát ulbmilat galget ollašuhttojuvvot.
Rávvagat
Ferte vuđolaččat digaštallat masa dakkár šiehtadus galgá leat ávkin, mo sáhttá ovddidit sámi dáidaga, ja sáhttá go ođđa šiehtadus, dálá dahje ođđa hámis, váikkuhit dakkár ovdáneami? Dakkár digaštallamii berrejit Sámedikki politihkalaš ja hálddahuslaš dássi ja sámi dáiddárorganisašuvnnat searvat.
Sámedikki mearkkašumit
-Vuosttažettiin árvvoštallan lea vuosttaš deaŧalaš vuođđu dan kulturdieđáhussii mainna Sámediggi dál lea bargamin ja dasto dat lea buorre vuođđun dáiddáršiehtadus viidáseappot ovddideapmái, dadjá sámediggeráđđi Vibeke Larsen. Sámedikki ulbmil lea duddjot buori ja lávga ovttasbarggu iežamet kultur- ja dáiddárorganisašuvnnaiguin. Buori ovttasbarggu bokte han mii sáhttit ovddidit sámi dáidda- ja kultureallima, ja dan várás addá árvvoštallan midjiide buriid rávvagiid dasa ahte mo mii sáhttit viidáseappot ovddidit dáiddáršiehtadusa, dadjá Larsen.
-Lea lunddolaš čuovvolit árvvoštallama dáiddárráđi ja Sámedikki gaskasaš čoahkkimis mas mii geahčadit mo bargat viidáseappot, lohká Larsen.
Raporta ja gulahallit
Barggu leat Norut Alta dutkit čađahan. Norut seniordutki Vigdis Nygaard lei prošeaktajođiheaddjin, prošeaktamielbargin lei Áila Márge Varsi Balto.
Eanet dieđuid addá: Magne Svineng, ealáhus-, kultur- ja dearvvašvuođaossodaga ossodatdirektevra, + 47 915 42 098
Dá lea ráporta:
Evaluering av kunstneravtalen.pdf 593,71 kB