-Sámi duodjemearka galgá ođasmahttojuvvot oktasaš sámi bargguin, ja mu mielas dat lea buorre dadjá sámediggeráđđi Silje Karine Muotka. Sámediggeráđđi lea juolludan 500.000 ru Sámiráđđái bargui maid dat lea álggahan Sámi duoji gálvo- ja kvalitehtamearkka ođasmahttimiin.
Duodjemearka lea mearka mainna duođaštuvvo ahte buvtta lea buvttaduvvon árbevirolaš sámi vugiid (sámi duodji) mielde. Mearkka ulbmilin lea muitalit oastái ahte buvtta lea duodji. Mearka galgá maiddái čájehit ahte buvtta lea kvalititehta dáfus dohkálaš.
Sámiráđđi galgá prošeavttas earret eará kártet movt duodjemearka dán rádjai lea doaibman ja de rávvet makkár doaibmabijuid dál fertešii álggahit mearkka ođasmahttima ektui, ja ahte olbmot dieđášedje maid dat mearkkaša.
-Munnje lea erenoamáš deaŧalaš, ja lea buorre go bargu dál galgá čađahuvvot lávga gulahallamiin sámi organisašuvnnaiguin ja duodjeealáhusain miehtá Sámi, ja go áigumuššan lea gulahallat sámiiguin Norgga, Ruoŧa, Suoma ja Ruošša bealde, dadjá Muotka. Sámi duodjemearka lea doaibman juo 35 jagi, ja mearka lea geavahuvvon miehtá sámi guovllu, dadjá sámediggeráđđi Silje Karine Muotka.
-Mii sávvat dieđusge ahte dát prošeakta nannešii ja ovdánahtášii duodjemearkka olles Sámis, ja dieinna lágiin livččii mielde buorideamen duoji stáhtusa kvalitehta dáfus vel eanet – ja maiddái gánnáhahttivuođa duodjeealáhusas dan bokte, dadjá Muotka.
Eanet dieđuid addá: Sámediggeráđđi Silje Karine Muotka, 984 87 576