Sámi parlamentáralaš ráđđi (SPR) lea maŋidan Sámi giellagáldu - Davviriikkalaš sámegiela fága- ja resursaguovddáža vuođđudanprošeavtta álggaheami, go buot ruđalaš bealit eai leat vel sajis.
Ásahusa vuođđudanprošeakta galggai álggahuvvot čakčamánu álggus, muhto SPR stivra maŋidii prošeavtta álggaheami mannan vahkus. SPR stivra háliidivččii álggahit prošeavtta boahtte jagi álggus.
Sámi giellaovttasbarggu ođasmahttin biddjui johtui badjel vihtta jagi áigi. Ovddasvástádus dán barggus lea Suoma Sámedikkis, mii maiddái eaiggáduššá ja jođiha prošeavtta.
Prošeavtta mihttun lea oažžut Sámi giellagáldu - Davviriikkalaš sámegiela fága- ja resursaguovddáža bistevažžan. Dát ođđa ásahus galggašii bargagoahtit giellagáhttemiin, giela ovddidemiin, terminologiijain, báikenamaiguin, giela normeremiin ja sámi giellaámmátlaš gažaldagaide guoski diehtojuohkimiin.
Sámi giellagáldu - Davviriikkalaš sámegiela fága- ja resursaguovddáža vuođđudanprošeavtta váldoruhtadeaddjin lea EU-Interreg Rájáhis ovdáneami Sápmi Davvi IV A-oasseprográmma. Dasa lassin prošeavtta ruhtadit sámedikkit, Lapin liitto, Romssa- ja Nordlándda fylkkasuohkan. Prošeavtta bušeahtta lea oktiibuot birrasii 14,6 miljon Norgga ruvnnu.
Eanet dieđuid:
Sámi parlamentárlaš ráđđi: SPR jođiheaddji Egil Olli +47 900 26 880.
Prošeaktajođiheaddji Suoma Sámediggi: Ságadoalli Klemetti Näkkäläjärvi +358 50 254 2109.