Gielda- ja ođasmahttindepartemeanta lea juolludan 2 mill davviriikkalaš giellaovttasbargui Sámi Giellagáldui. Dasa lassin lea aiddo nammaduvvon almmolaš lávdegoddi mii galgá geahčadit otná gustovaš lágaid, ortnegiid ja organiserema mat leat sámegiellabargguid várás. Dát čájeha ahte ráđđehusas leat positiivvalaš áigumušat vuoruhit sámegielaid.
- Mun lean movttat go ráđđehus čájeha ahte sii vuoruhit sámegiela go juolludeami addet davviriikkalaš giellaovttasbargui, ja go lea nammadan sámi almmolaš lávdegotti sámegielaid várás, dadjá sámediggepresideanta Aili Keskitalo.
- Dál go Sámi Giellagáldu oaččui juolludeami stáhtabušeahta bokte mearkkaša dan, ahte mii beassat joatkit bargguin ásahit oktasaš davviriikalaš sámi giellaovttasbarggu bistevaš doaibman. Sámi Giellagáldu ásahuvvui guovtte jagi áigi ovttasbargoprošeaktan gaskal Sámedikkiin Norggas, Ruoŧas ja Suomas. Dál lea norgga ráđđehus čájehan ahte sis lea áigumuš vuoruhit sámegiela, ja mus lea doaivva ahte Ruoŧa ja Suoma ráđđehusat čuovvolit ja juolludit ruđaid vai mii beassat ovttas vuoruhit sámegielaid, dadjá Keskitalo.
Sámegiella lea riikkaid váldogielaid deattu vuolde. Skuvlalágádus, eiseválddi bálvalusat, mássamedia ja eará servodaga bálvalusat leat ordnejuvvon dušše váldoálbmoga gillii. Sámedikki mielas lea davviriikkalaš giellaovttasbargu dehálaš sihkkarastin dihte sámegiela oktasašvuođu vai tearpmat sáhttet geavahuvvot rastá riikkarájiid. Sámi giellagáldu nanne sámegielaid gaskasaš gulahallama, bisuha ja nanne sámegielaid oktasašvuođu rastá riikkarájáid.