Sámegielaid giellaráját eai čuovo riikkarájáid. Ollislaš giellapolitihkka gáibida buori ovttasbarggu riikarájáid rastá. Ruoŧa, Suoma ja Norgga Sámedikkit bidje borgemánu álggus 2015:s johtui golmma jahkásaš rájáid rasttildeaddji ovttasbargoprošeavtta. Sámi Giellagáldu –joatkkaprošeakta lea sámi álbmoga oktasaš ja seammás bajimuš mearridanorgána sámegielaide guoski gažaldagain. Giellagáldu lea Sámi Parlamentáralaš Ráđi vuollásaš orgána.
Fállá giellaveahki
Giellagáldu bargá fágalaš áššedovdiorgánan, fállá giellaveahki ja rávve sámegielaid geavaheapmái guoski gažaldagain. Giellageavaheaddjit sáhttet jearrat rávvagiid ovdamearkan dasa, mo mii nu čállo sámegillii.
Giellageavaheaddjit Sáhttet sáddet Giellagáldui giellagažaldagaid facebooka www.facebook.com/SamiGiellagaldu dahje e-poastta bokte info@giellagaldu.com. Giellagáldu fállá giellaveahki, mii guoská lulli-, julev- ja davvisámegillii, sihke anárašgillii ja nuortalašgillii.
Terminologiija ja Normeren
Ođđa tearpmat leat sámegiela geavaheami eaktun beaivválaš hállangielas, čálalaš gielas, mediain, sosiálamediain ja visot eará giellageavahanarenain. Giellagáldu vihtta giellajuhkosa: Lulli-, julev-, ja davvisámegiela sihke anáraš- ja nuortalašgiela giellajuhkosat, dohkkehit ođđa tearpmaid, mearridit normeremis ja addet giellageavaheapmái guoski ávžžuhusaid.
Davviriikkalaš giellaovttasbargu lea dehálaš sámegielaid oktasaš vuođu seailluheami dáfus. Sámegiela galgá sáhttit geavahit rastá riikkarájáid nu, ahte ráját eai hehtte sámegielagiid gaskasaš gulahallama. Giellagáldu ulbmilin lea sajáiduhttit ovdamearkan lullisámegillii dakkár tearpmaid, maid ipmirdit sihke Norggas ja Ruoŧas. Giellagáldu bargá maiddái giellagáhttemiin, báikenamaiguin, giela ovddidemiin ja nammabálvalusain. Dasa lassin Giellagáldu bargun lea juohkit dieđuid sámegielaid ja giellaáššiid birra.
Prošeavtta ruhtadeaddjit
Giellagáldu –joatkkaprošeavtta ruhtadit EU Interreg Davvi V Sápmi –oasseprográmma, Norgga, Ruoŧa ja Suoma Sámedikkit, Lappi lihttu ja Romssa fylkkasuohkan. Prošeavtta jođiha Suoma Sámediggi. Prošeakta bistá 31.05.2018 rádjái.
Eanet dieđuid giellaorgána doaimmain gávnnat Giellagáldu ruovttusiidduin www.giella.org.