Čoahkkáigeassu sámegillii.pdf 234,50 kB
Eanet nuorat go boarrásat hállet lullisámegiela, lea okta dain bohtosiin mii boahtá ovdan Sámi giellaiskkadeamis 2012 maid Nordlandsforskning ASja Norut Alta – Áltá leat gávdnan Sámedikki, Ođasmahttin-, hálddahus ja girkodepartemeantta ja Máhttodepartemeantta ovddas.
Davvi- ja julevsámegielas lea gaskagearddi giellamáhtu njiedjan, muhto maiddái dás lea dilli veaháš buoret sin gaskkas geat leat vuolle 30 jagi, čájeha iskkadeapmi.
Sámediggeráđđi Ellinor Marita Jåma ja ođasmahttin-, hálddahus- ja girkoministtar Rigmor Aasrud leaba ilus go álggahuvvon gielladoaibmabijut leat ávkkuhan, erenoamážit lullisámi guovlluin.
- Lea erenoamáš deaŧalaš čalmmustahttit sámegielaid gáhttema, nannema ja ovddideami, dadjaba Jåma ja Aasrud.
Eretváljjejit sámegiela
Iskkadeapmi čájeha ahte golmmas viđa olbmos válljejit geavahit dárogiela vaikke vel livččii ge vejolaš geavahit dárogiela. Stuorámus sivvan válljet eret sámegiela lea go váilot sánit ja go eai oro iežaset mielas hállamin sámegiela doarvái bures. Lea šaddan dáhpin válljet eret sámegiela, dadjá iskkadeapmi.
Ovdalis áiggi hálle sámegiela juohke sajis, earret skuvllas. Iskkadeapmi čájeha ahte dál lea eanaš dušše nuoraid gaskka mánáidgárddis ja skuvllas ahte hállet sámegiela.
Buot sámi mánáin lea oktagaslaš vuoigatvuohta oažžut sámegieloahpahusa skuvllas. Iskkadeapmi čájeha ahte goalmmát oassi váhnemiin dadjet ahte mánát eai oaččo dan sámegieloahpahusa maid sis lea vuoigatvuohta oažžut. Váilevaš fálaldat skuvllas almmuhuvvo deaŧaleamos sivvan dasa.
-Mii fertet ovttas ráđđehusain bearráigeahččat ahte gieldda fállet sámegieloahpahusa ohppiide, vai mii oažžut eanet giellageavaheddjiid boahtteáigái, dadjá sámediggeráđđi Ellinor Marita Jåma.
Son dadjá viidáseappot ahte ferte oččodit eanet giellaarenaid, vai beassá geavahit sámegiela beaivválaš dilis.
-Dasa lassin ferte sámegiella boahtit buorebut oainnusin, sihke median ja muđui servodagas, dadjá Jåma.
Deaŧalaš reaidu
Giellaiskkadeapmi šaddá hui deaŧalaš reaidun Sámedikki ja ráđđehusa viidáset bargui sámegielaiguin. Bohtosat galget geavahuvvot daid doaibmabijuid hábmemii ja álggaheapmái, mat dagahit ahte sámegielat seilot ja ovddiduvvojit. Viidáseappot galget bohtosat geavahuvvot go Sámediggedieđáhus sámegielaid birra čállojuvvo.
Gulahalli
Sámediggeráđđi Ellinor Marita Jåma, tel. 916 13 460
Loga ráportta: Samisk språkundersøkelse 2012
Čoahkkáigeassu sámegillii.pdf 234,50 kB