Sámi kulturbargoarenat

Sámedikki barggut:

• Háhkat buriid rámmaeavttuid sámi ásahusaide vai dat sáhttet váikkuhit sámi dáidda- ja kultureallima ovddideami ja gaskkusteami
• Čielgasit muitalit makkár vuordámušat Sámedikkis leat sámi ásahusaide sin ovddasvástádusa ektui go guoská sámi dáidaga ja kultuvrra ovddideapmái
• Lávgadeappot čuovvolit ja gulahallat ásahusaiguin stivranammademiid ja doarjaga bokte
• Vel buoret ovttasbargu ja buoret fágalaš ovddasvástádusjuohku ásahusaid gaskka
• Váikkuhit vel buoret ovttasbarggu sámi dáiddáriid ja sámi kulturásahusaid gaskka
• Sámi kulturásahusaid viidáseappot nannen ja ođđasis organiseren

Ekonomalaš váikkuhangaskaoamit

Sámedikki váikkuhangaskaomiid mihttomearrin sámi kulturbargoarenaid várás leat sámi ásahusat ja dáidda- ja kulturgaskkustanarenat mat leat guovddáš aktevrrat ja eavttuid biddjit sámi servodat- ja demokratiijaovddideapmái. Oassemihttomearrin leat árjjalaš sámi arenat dáidaga- ja kultuvrra gaskkusteapmái, kulturásahusat ja museat main lea nana fágalaš dássi.

Sámediggi addá njuolgadoarjaga 27 sierra kulturbargoarenai 2013:s: Sámi kulturviesut ja kulturgaskkustanásahusat (12), sámi festiválat (7), sámi teáhterat (2) ja sámi museat (6).

Njuolggodoarjagat sámi kulturbargoarenaide galget váikkuhit:

• Sámi kulturgaskkustanásahusaid mat oainnusmahttet sámi kultureallima ja doibmet sámi kultuvrra ovddidanarenan
• Festiválaid mat oainnusmahttet, gaskkustit ja ovddidit sámi kultuvrra
• Dan ahte sámi teáhterat sáhttet ovdánit dáiddalaččat, buvttadit lávdedáidaga alla dásis ja sáhttet gierdomátkkiid dahkat lávdedáidagiin, nu ahte dat doibmet kulturvásihan- ja kulturgaskkustanarenan, ja sámegiela geavaheapmái ja oainnusmahttimii
• Ahte sámi kulturhistorjá suodjaluvvo, hálddašuvvo ja gaskkustuvvo

Ođas 2013:s lea ohcanvuđot ortnet “Dáidda- ja kulturgaskkustanarenat”. Dát ođđa ortnet buorida áŋgiruššama sámi dáiddáriid ektui, kulturdieđáhussii dávistettiin. Vuoruhemiid gaskkas dán ortnegis lea stuorát fokus ođđahutki doaimmaide mat galget váikkuhit sámi ásahusaid ja dáidda- ja kultur-gaskkustanarenaid ovddideami. Ortnegis addojuvvo doarjja maiddái arenaide, fierpmádagaide ja ovttasbargoprošeavttaide mat váikkuhit stuorát riikkaidgaskasaš vuovdaleami ja sámi dáidaga ja sámi dáiddáriid fievrrideami riikkaidgaskasaš márkanii, ja álggahanstipeanda nuorra sámi dáiddáriidda.