– Dáin ealáhusain leat stuorra vejolašvuođat ahtanuššat ja ekonomalaččat ovdánit sámi guovlluin. Ollu fitnodagat háliidit geavahit sámi kulturvuđđosa muhtun hámis fitnodaga ovddideamis, ja danne lea deaŧaleappot go goassige ovdal atnit fokusis eaktivuođa ja etihkalaš beali, cealká Magga.
Ovttasbargoráđi kultuvrra ja mátkeealáhusaid várás, mandáhtas fokuserejuvvo ovttasbargu mátkeealáhus- ja kulturaktevrraid gaskka, gávppálaš vejolašvuođain ovdánahttit kulturturismma. Ráđđi galgá buktit cealkámuša das movt sáhtášii nanosmahttit politihka hábmema kultur- ja mátkeealáhussuorggis.
Ráđis leat 17 lahtu. Okta sis lea Maria Utsi Davvi-Norgga riemuin.
– Lihkus lea Maria Utsi, geas lea gelbbolašvuohta sámi kulturealáhusaid siskkobealde, mielde joavkkus, muhto mun oaivvildan ahte mandáhta gal lea láivi, dadjá Magga.
– Maŋŋá go lean searvan Grüne Woche meassuide, máilmmi stuorámus biebmomessui, de ledje mus stuorát vuordámušat ráđđehusa viidáset bargui go dat mii dál lea duohtavuohta, šuohkiha Magga loahpas.
Jos áiggut jearahallama, de váldde oktavuođa sámediggeráđiin Mariann Wollmann Maggain, mob. 977 02 350.