Sámi kultuvrralaš ja hutkás ealáhusas lea buorre vejolašvuohta stuorrut

Lea miellagiddevaš dat mii Guovdageainnus dáhpáhuvvá hutkás ealáhusain go leat bargamin ovttastahttit searaid mat barget hutkás ealáhusain. Sámis lea guhkes árbevierru hutkás ealáhusaiguin bargat. Ollugiin geat barget sámi kultuvrralaš ja hutkás ealáhusain lea persovnnalaš kultuvrralaš mihttomearri hui guovddážis ja sávaldat sámi kultuvrra ja identitehta nannet dáidaga bokte. Dát motivašuvdna buktá návccaid ráhkadit alcces bargosaji mii lea nanus ja mii lea mielde eanet ollesáiggi virggiid buktimin dán suorgái. 

Guovdageainnu suohkan lea Hutkás gielda-prošeavtta pilohtagielda, mas áigumuššan lea ovddidit ealáhusaid main lea vuođđu sámi dáidagis ja kultuvrras. Mihttomearrin lea ovddidit modealla ja áibbas ođđa bargovuogi, mii ovddida ovttasbarggu, čalmmusvuođa ja aktivitehta hutkás ealáhusaid ja suohkana gaskka muđui.

Modealla vuođđun lea ahte ealáhus ieš mearrida ja vuoruha masa boahttevuođas áigu searaid bidjat olahan dihte hutkás gieldda. Ealáhusbargit leat dan guovtti bargočoahkkimis mat leat dollojuvvon ovddidan máŋga doaibmabiju maid háliidit čađahit.

Dás lea sáhka fierpmádaga huksemis, ovttasbarggus ja čalmmusvuođas. Ealáhus háliida earret eará lagat ovttasbarggu Sámi allaskuvllain joatkka- ja lassioahpu birra, ovdamearkka dihte gávpeovddideami fáttás. Ealáhusaktevrrat čujuhit ahte oktasaš promoteren Guovdageainnu ektui lea deaŧalaš ja ahte lea dárbu aktiivvalaš ealáhussearvái.

Hutkás ja kultuvrralaš ealáhusas lea buorre vejolašvuohta stuorrut Sámis. Dat dahká eanet bargosajiid, nannoseabbo árvoháhkama ja ain juo sámi árbevieru ja kulturmáhtu seailluheami vejolažžan. Dat lea okta Sámedikki máŋga áŋgiruššansurggiin, ja danne lea movttiidahtti oaidnit ahte pilohtaprošeakta Hutkás gielda dál juo lea ealáhusas alddis, gielddas ja iešguđetlágan ásahusain ožžon nu ollu positiivvalaš beroštumi. Mihttomearrin lea hukset nannoseabbo hutkás ealáhusa sámi guovlluin. Go mii nannet hutkás ealáhusaid ja árvoháhkama, de mii dainna sáhttit nannet maiddái sámi kultuvrra, servodaga ja ássama.

Sámedikki bealis mii leat ilus go sihke Guovdageainnu suohkana hálddahus ja politihkalaš jođiheaddjit leat initiatiivva váldán bures vuostá. Dát ovttasbargomodealla sáhttá šaddat modeallan boahttevaš bargui eará gielddain main hutkás ealáhusain lea stuorrunvejolašvuohta.

Hutkás gieldda deaŧaleamos návccat leat dat olbmot geat barget hutkás ja kultuvrralaš ealáhusain. Dát čeahpes ja áŋgiris álggaheaddjit ja fitnodateaiggádat leat prošektii searvamiin dán rádjái duođai bargan pilohtaprošeavttain ja lokten iežaset ealáhussuorggi. Dat lea deaŧaleamos eaktu lihkostuvvamii kultuvrralaš ja hutkás ealáhusaid ovddidemiin boahtteáiggis.