Sámediggeráđđi almmuha odne iežas bušeahttaevttohusa Sámediggái jahkái 2016. – Ráđđehusa stáhtabušeahttaevttohusas gáržžiduvvojit rámmat sámi servodaga ovddideapmái, konstatere sámediggeráđđi Ann-Mari Thomassen.
Sámediggeráđi bušeahttaevttohusas Sámediggái 2016:s lea oktiibuot gollorámman 434 miljon ru. Dat lea 5,6 miljon ru eanet go 2015 reviderejuvvon bušeahtas, muhto go rehkenastá hadde- ja bálkágoargŋuma ektui, de lea bušeahtta duohtavuođas njiedjan 0,5 % go buohtastahttá ovddit jagi bušeahtain.
- Bušeahta geažil fertet unnidit doaimmaid sámi servodagas, muđui gal stáhtabušeahtta lea sakka ovdánan. Muhto mun lean duhtavaš go mii hui gáržžes rámmaid siskkobealde leat nagodan vuoruhit doaibmabijuid nannet sámi giela, erenoamážit mánáid ja nuoraid ektui. Midjiide lea deaŧalaš láhčit diliid nu ahte mánát galget oahppat eanet sámepolitihka ja demokratiija birra, deattuha Thomassen.
Doaibmabidju “mánáid sámediggi” evttohuvvo ruhtaduvvot 400 000 ruvnnuin. Sámediggi evttoha vuoruhit barggu ahte eanedit vánhemiid logu geat geavahit sámegiela váldogiellan mánáidasaset. Ráđđi evttoha muđui ahte ásahuvvo ođđa giellaarena joatkkaskuvllaid nuoraide geat váldet sámegiela. Juolludus sámi giellaguovddážiidda evttohuvvo lasihuvvot 4 miljon ruvnnuin. Juolludusat sámi kulturásahusaide evttohuvvojit lasihuvvot 1,7 miljon ruvnnuin.
- Mii leat válljen vuoruhit daid surggiid main dárbu lea stuorámus, ovdamearkka dihtii addit mearkkašahtti lasáhusa lullisámi kulturfestiválii. Muhto mun dovddastan ahte lea hui gáržžes doaibmanvejolašvuohta 2016 bušeahtas, dadjá Ann-Mari Thomassen.
Thomassen deattuha ahte Sámedikki bušehttii ja sámi servodahkii čuohcá hui ollu ráđđehusa váilevaš dáhttu dohkkehit dárbbuid sámi servodagas. Son čujuha ahte go ráđđehus áigu deattuhit davviguovlluid ja gieldaođastusa, de mielddisbuktá dat eanet hástalusaid ja deattu sámi servodahkii.
- Dát lea earret eará duogážin dasa go Sámediggeráđđi maiddái 2016:s evttoha joatkit davviriikkalaš ja riikkaidgaskasaš álgoálbmotbarggu alla aktivitehta dásis. Mihttomearrin lea konkretiseret sámiid ja eará álgoálbmogiid vuoigatvuođaid nana searvama bokte riikkaidgaskasaš mearrádusproseassain. Mii oaidnit ahte álgoálbmogiid ja sin vuoigatvuođaid ovdáneamis riikkaidgaskasaččat lea konkrehta mearkkašupmi Norgga sámepolitihka ja sámi vuoigatvuođaid ovdáneapmái báikkálaččat gielddain ja sámi ássanguovlluin.
Oktavuohta:
Sámediggeráđđi Ann-Mari Thomassen, tel. + 47 900 57 123