Vuosttaš sámi riikkačoahkkima Troandimis 100 jagi ávvudeami oktavuođas lea Norgga Báŋku mearridan almmuhit muitomintta. Sámedikki presideantta Aili Keskitalo mielas dát lea dán deaŧalaš olahusmearkka gelbbolaš gudnejahttin.
- Lea hui illudahtti oaidnit ahte Norgga Báŋku lea čuvvon Sámedikki jagi 2011 ávžžuhusa ja dál áigu gudnejahttit ávvudeami Troandimis sierra muitominttain, cealká presideanta Keskitalo.
Guovvamánu 6. b. 1917 čoahkkanedje vuosttaš geardde davvi- ja lullisámit iešguđet riikkain stuorra čoahkkimii digaštallat ja guorahallat oktasaš áššiid ja čuolbmačilgehusaid. Čoahkkin dollojuvvui Metodistagirkus gosa bohte badjel čuohte oassálasti, stuorra oassi dain ledje nissonolbmot.
Elsa Laula Renberg lea erenoamáš olmmoš sámi historjjás ja su jurdaga duohtandahkan, vuosttaš sámi riikkačoahkkin Troandimis, lea deaŧalaš olahusmearkan sámi álbmogii.
Stuorra 100 jagi ávvudeapmi lea plánejuvvon Troandimii jagis 2017.