Sámi nationálasymbolalávdegotti lahtut deaivvadedje Kárášjogas guovvamánu 25. ja 26 b. 2015. Mainna lágiin hálddašit ja dahkat njuolggadusaid symbolaide lea okta doaimmain mii galgá čovdojuvvot dás duohko.
Sámiráđđi (1953/1956) lea sorjjasmeahttun kulturpolitihkalaš ja politihkalaš oktasašsámi organisašuvdna. Dat lea Norgga, Ruošša, Ruoŧa ja Suoma beale Guoládatnjárgga sámi organisašuvnnaid ovttasbargoorgána.
Sámiráđđi lágidii 1986:s Sámekonferánssa Åres mii mearridii leavgga, álbmotlávlaga ja álbmotbeaivvi sámi nationála symbolan. Symbolat leat sámi álbmoga oktasaš opmodat. Dain lea prinsihpalaš mearkkašupmi sámiide sorjjakeahttá riikarájáin Norgga, Ruošša, Ruoŧa ja Suoma gaskka.
Sámi parlamentáralaš ráđđi ásahuvvui 2000:s. Dat lea Norgga, Ruoŧa ja Suoma beale sámedikkiid ovttasbargoorgána. Ruošša beale sámi organisašuvnnat mat ovddastit Sámiráđi servet bissovaččat Sámi parlamentáralaš ráđđái.
Lávdegotti bargu
Sámi parlamentáralaš ráđđi mearridii 2004:s ahte galggai ásahuvvot ovttasbargu Sámiráđiin sámi nationálasymbolaid hálddašeamis. Ásahuvvui lávdegoddi mas leat Sámiráđi, Norgga, Ruoŧa ja Suoma bealde sámedikkiid ovddasteaddjit, ja sámi ovddastus ruošša bealde.
Lávdegotti bargun lea ráhkadit njuolggadusevttohusa sámi nationálasymbolaid hálddašeapmái, ja ovddasvástádusa hálddašeapmái.
Lávdegotti lahtut Kárášjogas
Lávdegotti lahtut deaivvadedje nuppe gearddi Kárášjogas guovvamánu 25. ja 26 b. 2015. Čoahkkin lei lávdegotti barggu álggahančoahkkin. Čoahkkimis ledje jođiheaddji Anders Kråik Ruoŧa beale Sámedikkis, lahttu Beaska Niillas Norgga beale Sámedikkis. Nuppi beaivvi searvvai Sámiráđi presideanta Áile Jávo. Dasa lassin ledje čoahkkimis Sámiráđi, Norgga ja Ruoŧa beale sámedikkiid hálddahusa ovddasteaddjit.
Čoahkkimis árvvoštallojuvvojedje lávdegotti bargamušat mandáhta ektui. Lávdegotti historjjálaš duogáš lei guovddáš fáddán lávdegotti ásaheapmái. Sámiráđđi čuvgii makkár deaŧalaš bealit leat eaktun lávdegotti ásaheapmái. Leat ollu gažaldagat mat čatnasit nationálasymbolaid ieš hálddašeapmái, ja gosa ovddasvástádusa hálddašeamis sáhttá bidjat. Dárbu lea kártet ja árvvoštallat lagabuidda dán rolla, ja lávdegoddi lea álggahallamin dán barggu. Lávdegoddi árvvoštallá čađahit diehtojuohkinlonuhallančoahkkima Sámi parlamentáralaš ráđiin.
Vejolaš ođđa leavgabeaivi
Barggu boađusin šattai evttohus movt lávdegoddi galggašii bargat viidáseappot. Evttohusa birra ferte digaštallat lávdegotti eará lahtuiguin, ja čoahkkimis eai dahkkojuvvon makkárge mearrádusat. Evttohusas čuožžu earret eará ahte lávdegoddi áigu lagabuidda geahčadit vugiid ja vejolašvuođaid movt evttohit politihkalaš meannudeapmái dan ahte Elsa Laula Renbergga riegádanbeaivi šattašii ođđa almmolaš sámi leavgabeaivin.