Sámediggeráđđi Mikkel Eskil Mikkelsen lea hui movtta go bargu álggahit sámi buohccidivššároahpu dál orru buktimin bohtosiid.
– Dát lea hui buorre sámi servodahkii, dadjá Mikkelsen.
Sámi buohccedivššároahppu lea ovttasbargu UiT Norgga árktalaš universitehta ja Sámi allaskuvlla gaskka, ja masa leat plánejuvvon 25 oasseáiggeoahpposaji. Lassin oahpposajiide, áigot ráđđehusbellodagat ja Risttalaš álbmotbellodat addit ruđaid Sámi allaskuvlii oahpu láhčimii. Oktiibuot lea dát birrasii 2 miljon ruvnno 2019:s.
Mikkelsen rámiida Sámi allaskuvlla ja UiT Norgga árktalaš universitehta go ovttas barget sámi buohccidivššároahpu vuoruhemiin.
– Dát čájeha geavahusas ahte sii váldet servodatovddasvástádusa sámi servodaga ektui duođalaččat, dadjá Mikkelsen.
Jearahallama addá sámediggeráđđi Mikkel Eskil Mikkelsen, mob. +47 917 42 161