Buohkat geat álget ođđa mánáidgárdeoahpaheaddjiohppui galget oahppat sámi giela, kultuvrra ja servodaga birra.
2013 čavčča biddjui ođđa mánáidgárdeoahpaheaddjioahppu johtui. Ulbmil oahpuin lea ahte dat galgá leat ovttastuvvon, profešuvnnalaš ja dutkanvuđot mánáidgárdeoahpaheaddjioahppu mii maiddái lea geasuheaddji, ođđahutkkálaš ja gáibideaddji, ja mas lea buorre kvalitehta.
Viidáseappot lea nammaduvvon čuovvunjoavku mii galgá čuovvut ja árvvoštallat ovdáneami mánáidgárdeoahpaheaddjioahpus, juogadit máhtu čađaheami ja reforbma bohtosiid birra vejolaš geavaheddjiide. Viidáseappot áigu čuovvolanjoavku čuovvolit mihttomeriid ođđa rámmaplánas, bagadallat ja addit rávvagiid ásahusaide ja láhčit dili kvalitehtabuorideapmái oahpahusain
Loga eanet FG-BLUbirra:http://blu.hib.no/
Sámedikki ovddasteaddji čuovvolanjoavkkus lea Marianne Helene Storjord, fágajođiheaddji mánáidgárdejuhkosis, Sámedikkis, Kárášjogas.
Sámi perspektiiva
Sámediggi lea rahčan oažžut sámi perspektiivva čalmmusin ođđa našunála mánáidgárdeoahpaheaddjiohppui.
-Ovddit našunála láhkaásahusas ovdaskuvlaoahpaheaddjioahpus ii lean sámi birra namuhuvvon duođi eanet. Danin lea dát dehálaš dáhpáhus Norgga mánáidgárdeoahpaheaddjioahpus, lohká sámediggeráđđiSilje Karine Muotka.
-Lea dehálaš ahte čalmmustahttin sámi áššiin ođđa našunála mánáidgárdeoahpaheaddjioahpus čuovvoluvvo. Lea maid dehálaš ahte dahkko čielggasin ja biddjojit searat viidáset- ja joatkkaohppui sámi fáttáid birra sin várás geat juo leat gazzan oahpu ja barget mánáidgárddiin, lohká Muotka.
Buot máhttosurggiin
Ođđa mánáidgárdeoahpaheaddjioahpus ii galgga studeanttain leat fága, muhto máhttosuorggit. Buot guđa máhttosuorggis galget dál mánáidgárdeoahpaheaddjit oažžut oahpu sámi perspektiivvas.
Sáhttá ovdamearkka dihte namuhit ahte studeanttat galget dovdat earret eará sámi bajásgeassima birra, sámi historjjá birra álgoálbmogin, osiid sámi kultuvrra ja árgabeaidili birra, sámi máinnastanárbevieru birra, sámi duodjeárbevieruid birra ja sámi mánáid vuoigatvuođaid birra.
-Go váldá sisa dákkár gelbbolašvuođa buot mánáidgárdeoahpaheddjiide Norggas, de ferte dát maiddái boahtit ovdan mánáidgárddi rámmaplánas. Dát mielddisbuktá ahte buot mánát Norgga mánáidgárddiin galget beassat diehtit sámi álbmoga birra, lohká Muotka.
-Ođđa mánáidgárdeoahpaheaddji galget skuvlejuvvot ja viidásetgaskkustit dán máhtu buot mánáidgárddiide Norggas. Dát lea buorre ja dehálaš ovdáneapmi, lohká sámediggeráđđi Silje Karine Muotka.
Vuoruhit lasseoahpu
Hástalus maid Sámediggi oaidná, lea ahte váilot fágaolbmot ja oahpaheaddjit geat sáhttet skuvlet studeanttaid. Danin ferte vuoruhit viidáset- ja lasseoahpu sámi gielas ja kultuvrras fágabargiide alit oahpus.
Sámediggi oaidná ahte gelbbolašvuohta sámi giela ja kultuvrra birra fágabargiin lea vealtameahttun dasa movt studeanttat ožžot oahppat, ipmárdusa, beroštumi ja máhtu sámi giela ja kultuvrra birra mánáidgárdesuorggis. Dát máhttu šaddá boahtteáiggi mánáidgárdeoahpaheddjiid eakun das ahte sáhttit gaskkustit ja ovddidit sámi giela ja kultuvrra mánáidgárddis.
Eanet dieđut:
Sámediggeráđđi Silje Karine Muotka, 984 87 576