Sámedikki álgaga vuođul almmuha Sámi allaskuvlla Guovdageainnus dán čavčča áibbas ođđa joatkka ja viidáset oahppofálaldaga. Fálaldaga namma lea “Suohtas - Gøy” ja dat galgá veahkehit sámi skuvllaid atnigoahtit ođđa teknologiija ohppiidasaset.
- Mii leat hui ilus go gielddat ja sámi skuvllat Finnmárkkus čájehit beroštumi geavahit ođđa teknologiija oahpahusas, dadjá Jelena Porsanger, Sámi allaskuvlla rektor.
Lohkanguovddáš, mii lea oahpahusvuogádaga resursaguovddáš Sámi allaskuvllas, lea ovddidan dán oahppofálaldaga.
Fálaldaga ulbmilin lea addit oahpaheddjiide ja ohppiide vejolašvuođa oahppat Máhttoloktema – sámi prinsihppaoasi birra, oahpahusa bokte ođđa teknologiija vuođul. Sámi allaskuvlla Lohkanguovddáš háliida fállat oahpaheddjiide viidáset- ja joatkkaoahpu IT-vuđot oahppanreaiddu bokte. Ulbmilin lea ahte oahpaheaddjit sáhttet oahpahit bargoskihpáriid báikkálaš skuvllain, ja bagadit sin dán geavaheamis oahpahusa kvalitehta dárkkisteamis ja buorideamis Sámi oahppoplakáhta ektui.
- Mii vásihit ahte dađistaga eanet skuvllat áiggošedje oahppat movt geavahišgoahtit ođđa teknologiija oahpahusas. Min kursa addá máhtolašvuođaid geavahišgoahtit neahttavuđot oahpahusvuođu (nu gohčoduvvon PedIT) mii lea heivehuvvon sisaktiivvalaš geavahussii ja maiddái sámi beliide, čilge Jelena Porsanger.
Sámedikki álgga lea Sámedikki 2011 oahpahusdieđáhusa čuovvoleapmi, ja maid máŋga gieldda leat evttohan. Sámedikki várrepresideanta Laila Susanne Vars oaidná sihke vejolašvuođaid ja hástalusaid prošeavtta oktavuođas.
- Sámediggeráđđi gulahallá lávga Máhttodepartemeanttain go guoská Máhttoloktema – sámi čuovvoleapmái. Dál go ollu oahpahusas sirdojuvvo nehttii, de bidjá dat alla gáibádusaid dasa ahte sámi perspektiiva maid čuvošii teknologalaš ovdáneami. Go fállá viidáset oahpu sámi skuvllaid oahpaheddjiide, de lea das danne ávki sámi ohppiide njuolga. Hástalussan lea dattetge ahte buot skuvllain eai leat teknihkalaš rusttegat čuovvolit IT-ovdáneami, dán oktavuođas fertejit suohkanat bidjat ruđaid skuvllaide, ávžžuha Sámedikki várrepresideanta Laila Susanne Vars.
Oahppofálaldat álggahuvvo dán čavčča, ja dán rádjai leat dieđihan 15 oasseváldi. Oahppofálaldagas leat golbma modula ja juohkehaš dain addá 10 oahppočuoggá, oktiibuot šaddet 30 oahppočuoggá. Oahppofálaldagas leat 4 kursačoagganeami ja dain leat čuovvovaš fáttát:
- PedIT atnui váldin oahpahusreaidun
- Searvvahahtti oahppanarenat sámi skuvllas
- Pedagogalaš ovddidanbargu sámi skuvllas
- Heivehuvvon oahpahus ja ohppiid eavttut sámi skuvllas
Gulahallan:
Sámi Allaskuvlla rektor, Jelena Porsanger Tel. 92262212
Sámedikki várrepresideanta Laila Susanne Vars Tel. 97754102
Sámi Lohkanguovddáža prošeaktajođiheaddji Tove-Lill Labahå Magga Tel. 78448622