Sámediggi lea ovttasbarggus Riikaantikvárain ja Dálkkádat- ja birasdepartemeanttain identifiseren ja registreren sámi visttiid mat leat huksejuvvon ovdal 1925. Prošeavtta ulbmil lea leamaš háhkat dieđuid ráfáidahttojuvvon sámi visttiid birra Norggas.
Prošeaktaáigodagas 2011 rájes leat registrerejuvvon lagabui 1000 vistti, Plassje rájes lullin Deanu rádjai davvin.
Maŋŋebárgga borgemánu 29.b. čalmmustahttojuvvui sámi visteregistrerenprošeavtta loahpaheapmi Gállogietti olgomuseas Evenášši suohkanis. Gonagaslaš Allavuohta Kruvnnaprinsa Haakon oassálasttii ávvudeapmái.
Govva: Sølve (5 jagi) ja Sofie (5 jagi) geigeba liđiid Gonagaslaš Allavuhtii Kruvnnaprinsa Haakonii (Govva Jan Roger Østby).
– Gállogieddi čalmmustahttá dan stuorra ja deaŧalaš barggu loahpaheami ahte fuolahit min sámi kulturhistorjjá, dadjá Gonagaslaš Allavuohta Kruvnnaprinsa Haakon sártnistis.
– Stuorra árjjain lea sámi leahkin ja sámi historjá duođaštuvvon – Deanu rájes davvin Plassje rádjai lullin, dadjá Kruvnnaprinsa Haakon.
Govva: Guldaleaddjit Gállogiettis
Oainnusmahttá sámi kultuvrra ja historjjá
Sámediggepresideanta Vibeke Larsen dadjá ahte registreremat leat mielde oainnusmahttimin sámi kultuvrra ja identitehta sihke báikkálaččat ja riikkaviidosaččat.
Larsen dadjá ahte registrerenbargu lea lokten vuordámušaid, sihke visteeaiggádiin ja báikegottiin ahte sihkkarastit visttiid boahtteáigái.
– Registrerenbargu lea bidjan vuođu visttiid boahttevaš hálddašeapmái, ja mii fertet ovttas Riikaantikvárain ja Dálkkádat- ja birasdepartemeanttain čuovvulit dán deaŧalaš barggu, dadjá Larsen.
Govva: Čalmmusteami oktavuođas galledii Gonagaslaš Allavuohta Kruvnnaprinsa Haakon Borri Skániin. Doppe oahpásmahttojuvvui kruvnnaprinsa geavatlaš ovddeštanbargui. Borris ovddeštuvvo láhtu 1800-logu gaskkamuttus (Govva Mia De Coninck)
Deaŧalaš bargu
Riikaantikvára Jørn Holme dadjá ahte Sámediggi lea čađahan máđohis stuorra barggu identifiseret ja registreret sámi visttiid mat leat huksejuvvon ovdal 1925.
– Dál mii oaidnit dan barggu. Geahčastat mii dahká vejolažžan hálddašit dáid visttiid buori vugiin. Mii dárbbašit máhttovuđot hálddašeami, guoskkaš go dal dálkkádatpolitihkkii, gumpii, mearraguovlluide vai sámi visttiide, dadjá Riikaantikvára Jørn Holme.
Buorre ovttasbargu
– Mii giitit buot viessoeaiggádiid, ovttasbargoguimmiid ja eaktodáhtolaččaid lágideami oktavuođas Gállogiettis ja Borris, dadjá Larsen.
Sámediggepresideanta Vibeke Larsen dadjá ahte Sámediggi lea suokkardan olles Sámi guovllu govvenapparáhtaiguin, mihttobáttiiguin ja sárgunbáhpáriiguin, oaidnán visttiid iešguđet dilis, deaivan olbmuid ja háhkan dieđuid visttiid birra.
Govva: Ruvdnaprinsa dearvvaha Therese Olsen ja Lemet Máhtte Eira Sara
Loga eanet:
http://www.kongehuset.no/nyhet.html?tid=157348&sek=26939
http://www.kongehuset.no/tale.html?tid=157347&sek=26947&scope=27247
http://www.riksantikvaren.no/Aktuelt/Nyheter/Markering-av-samiske-bygningsregistreringer
https://www.sametinget.no/Tjenester/Miljoe-areal-og-kulturvern#section-Samisk-bygningsvern