Sámi vistesuodjalusas lea sáhka identifiseremis ja registreremis ja áimmahuššamis automáhtalaččat ráfáidahttojuvvon sámi visttiid boahtteáigái. Dakkár visttit lea gáldun máhttui ja historjái sámi servodaga ja báikegottiid birra gos dat leat. Áigodagas 2011-2017 hoahpuha Sámediggi visttiid registrerema mat leat huksejuvvon ovdal jagi 1025. Sámi ja automáhtalaččat ráfáidahttojuvvon visti lea sámi visti mii lea boarráset go 100 jagi.
Mii lea sámi visti
Sámi visti gullá sámi historjái ja kultuvrralaš oktavuhtii. Das sáhttá leat erenoamáš doaibma dahje biraslaš oktavuohta. Maiddái huksenvierut ja báikkálaš áddejumit ja historjját vistti birra lea deaŧalaš oassi árvvoštallamis lea go visti sámi visti vai ii.
Deaŧaleamos dovdomearka árvvoštallamis lea guđe oktavuođas kulturmuitu lea ja čatnasa go dasa sámi kultuvra ja historjá. Maiddái lea deaŧalaš čatnasa go visti historjjálaš dáhpáhusaide, ja mo dat lea báikáduvvon gillái dahje kultureanadahkii.
Buot sámi visttit mat leat badjel 100 jagi boarrásat, leat automáhtalaččat ráfáidahttojuvvon.
Bagadus ráfáidahttojuvvon visttiid eaiggádiidda
Rievdadusat mat sáhttet vahágahttit automáhtalaččat ráfáidahttojuvvon visttiid kulturmuitoárvvuid, eai leat váldonjuolggadusa vuođul lobálaččat. Rievdadusat galget čađahuvvot várrugasvuođain ja vistti árvvusatnimiin. Rievdadusat olggobealde dábálaš bajásdoallama gáibidit lobi Sámedikkis.
Ráfáidahttojuvvon visttiid eaiggádiin lea vuoigatvuohta oažžut bagadusa ja rávvagiid rievdadusdoaibmabijuid ja bajásdoallama oktavuođas. Muhtun doaibmabijuide sáhttá gáibiduvvot plánen ja sierralohpi njuolggadusain.