Sámit ja inuihtat sohpe oktasaš mihttomeriid Nuuk:s

Sámiid ovddastus lei Sámi parlamentáralaš ráđi ja Sámiráđi bokte, ja inuihtaid ovddastus lei fas Ruonáeatnama iešmearridanstivrra ja Inuit Circumpolar Council (ICC) bokte.

Presideanta ja Sámi parlamentáralaš ráđi jođiheaddji Egil Olli cealká ahte lea hui duhtavaš go lei buorre ovttasbargu inuihtaid ja sámiid gaskka.

-    Čoahkkin čađahuvvui dávgasit ja buori vuoiŋŋas. Oktasaš árktalaš julggaštus lea ráhkaduvvon lávga ovttasbargguin sámiid ja inuihtaid gaskka, ja julggaštusas deattuhuvvo čielgasit man deaŧalaččat álgoálbmotrievttit leat, nugo dat earret eará ovdan bohtet ON álgoálbmotjulggaštusas mii mearriduvvui 2007, cealká Egil Olli.

Sámit ja inuihtat dovddahit julggaštusas makkár vuordámušat sis leat doaibmabijuid ja vuoruhemiid ektui maid máilmmikonferánsa galggašii mearridit vai álgoálbmogiid olmmošvuoigatvuođaid nannen sihkkarastojuvvošii.

-    Min oktasaš posišuvnnas leat doaimmat ja das leat ollu ođđa jurdagat maid evttohit ávkin álgoálbmogiidda miehtá máilmmi jos dat čuovvoluvvojit máilmmikonferánssas. Mun jáhkán ahte min oktasaš julggaštusas leat buorit árvalusat prosessii álgoálbmogiid 2014 máilmmikonferánssa várás, deattasta Egil Olli.

Loahpas dadjá Egil Ollu ahte Sámi parlamentáralaš ráđđi lea hui duhtavaš dainna árktalaš guovllu loahppadokumeanttain, mas leat guovllu vuoruheamit máilmmikonferánsii. Julggaštusas váldojuvvojit fáttát nugo álgoálbmogiid iešmearridanriekti; eatnamiidda, čáziide, resurssaide ja árbevirolaš eallinvugiide.

-    Julggaštusas evttohuvvo lassibeavdegirji ON álgoálbmotjulggaštussii, dainna áigumušain ahte nannet álgoálbmotrievtti čađaheami ja rivttiid eana- ja luondduriggodagaide; doaibmabijut maiguin nannet álgoálbmotrivttiid leat; kultuvra, giella, oahppu, dearvvašvuohta; álgoálbmogiid rájáidrasttideaddji rievttit, ja dasto evttohuvvojit doaibmabijut maid bokte nannet ON barggu álgoálbmotrivttiiguin, dadjá Olli loahpas. 

Gulahallanolmmoš:

Presideanta ja Sámi parlamentáralaš ráđi jođiheaddji, Egil Olli. Tel. 900 26 880

 Nuuk Arctic Declaration on the World Conference on Indigenous Peoples 2014.doc 47,00 kB