– Mii háliidit ahte sámi nuorain galgá leat oadjebas bajásšaddan, ja ahte sii galget dovdat iežaset oadjebassan juohke sajis servodagas. Danne leat mii badjel jagi bargan garrasit Oadjebas Sápmi-prošeavttain, mii galgá nuoraid fuomášuhttit dán fáttá hástalusaid, ja erenoamážit geahčadit dan mo mii konkrehta sáhttit gieđahallat daid, muitala Sámedikki nuoraidpolitihkalaš lávdegotti (SáNuL) jođiheaddji, Ánná Káisá Partapuoli.
Mánáid-, nuoraid- ja bearašdirektoráhta (Bufdir), Landsforeningen for ungdomsorganisasjoner (LNU) ja SÁNAG (Sámi našuvnnalaš gealboguovddáš - psyhkalaš dearvvasvuođasuddjen ja gárrendilledikšu) leat miellágideaddjin ovttas SáNuL:in. Bufdir doarju prošeavtta ruđalaččat, ja das leat maiddái ovttas LNU:in ja SÁNAG:in nana resursaolbmot dán fáttás. Partapuoli lea duhtavaš go lea ožžon fárrui dakkár čeahpes olbmuid.
– Lean hui giitevaš go mii leat ožžon fárrui dakkár čeahpes fágaolbmuid geain lea jáhkku prošektii. Ovttas singuin jáhkán oažžut hui buori kursavahkkoloahpa, ja mii SáNuL bealis doaivut ahte dát prošeakta sáhttá vuolggahit stuorát oktasaš árjja vuosttaldit rihkkumiid Sámis. Rihkkumiid ii galgga čiegadit ja jávohuhttit áibbas. Dakkár áššiid ferte váldit duođas, ja dat gáibida árjja buot servodatbeliin, loahpaha Partapuoli.
Gulahalli: SáNuL’ jođiheaddji Ánná Káisá Partapuoli, +47 915 74 533
SáNuL blogga, gos gávdná eanet dieđuid kursavahkkoloahpa birra ja bovdehusaid máŋgga gillii.