Sámedikki presideanta Aili Keskitalo lea ilus go giellalávdegotti oasseraporta lea buktojuvvon. –Mii háliidit ahte raporta buvttihivččii buori ságastallama sámegiela boahtteáiggi hálddašeami birra, dadjá Sámedikki presideanta Aili Keskitalo.
Sámegielaid giellalávdegotti bargun lea čielggadit gustovaš ortnegiid, doaibmabijuid ja njuolggadusaid sámegielaid várás, ja árvvoštallat movt daid sáhtášii heivehit almmolaš suorggi dáláš organiseremii ja sihkkarastit doaibmi ja ovttaárvosaš almmolaš bálvalusaid sámegillii.
Sámediggi ja Gielda- ja ođasmahttindepartemeanta leat ovttas ráhkadan mandáhta giellalávdegoddái ja nammadan dasa lahtuid.
-Ollu lea dáhpáhuvvan dan rájes go Sámelága giellanjuolggadusat álggos mearriduvvojedje 25 jagi dassážii, earret eará leat eanet gielddat boahtán sámegielaid hálddašanguvlui. Danne lea áigi vuđolaččat geahčadit lágaid, doaibmabijuid ja ortnegiid sámegiela várás, dadjá Sámedikki presideanta Aili Keskitalo.
Lávdegoddi lea ožžon maŋiduvvot áigemeari buktit loahpalaš raportta borgemánu 15. b. 2016, muhto lea buktán oasseraportta mas leat prinsihpalaš árvvoštallamat ja bajimuš doaibmabijut gielddaid geatnegasvuođaid ja struktuvrra birra sámegielaid ektui.
-Sámepolitihkka duohtan dahkkojuvvo dábálaččat gielddain ja danne lea midjiide hui gelddolaš oaidnit oasseraportta sisdoalu. Dasa lassin ferte raporta geahčaduvvot daid proseassaid olis mat čatnasit suohkanođastussii, go suohkanat galget mearridit ovttastahttimiid ovdal geasi, dadjá Keskitalo.
-Sámediggi lea ožžon raportta ja áigu dál vuđolaččat geahčadit sisdoalu ja lávdegotti láhkarievdadusevttohusa, dadjá Sámedikki presideanta Aili Keskitalo loahpas.
Eanet dieđuid addá:
Sámedikki presideanta Aili Keskitalo, 971 29 305
Dákko sáhtát lohkat raportta:
http://www.samisksprakutvalg.no/