Sámediggeráđđi sávvá lihku Vuotnasiidda joatkkaskuvlii go lea vuoitán Benjamin-bálkkašumi 2015. Bálkkašupmi lea skuvlabálkkašupmi mii juhkkojuvvo skuvlii mii árjjalaččat bargá vuostá rasismma ja vealaheami.
Vuotnasiidda joatkkaskuvla lea vuosttaš skuvla Davvi-Norggas mii goassige lea ožžon dán skuvlabálkkašumi dan rájes go dat vuosttaš gearddi juhkkojuvvui 2002:s. Bálkkašupmi lea ožžon nama Benjamin Hermansen mielde, gii goddojuvvui 15 jahkásažžan, ođđajagimánu 26. b. 2001, ja dan dagu duogábealde ledje nazisttat.
Sámediggeráđđi Silje Karine Muotka rámiida skuvlla danne go sin rasisma vuostá bargu lea mealgat nannejuvvon dan bokte go skuvla lea bidjan fokusa ja čanastumi sámi kultuvrii.
- Dat go Vuotnasiidda joatkkaskuvllas lea namma sámegillii, čalmmusta Sámi álbmotbeaivvi, čađaha sierra fágabeaivvi boazodoalu ja sámi kultuvrra birra ja searvvaha Sámi ofelaččaid, leat doaibmabijut mat čájehit ahte sin rasismma vuostálastin bargu lea bures fakkastuvvon skuvlla guhkesáiggi barggus.
Son sávvá ahte eanet Davvi-Norgga skuvllat boahtteáiggis anášedje Vuotnasiidda joatkkaskuvlla inspirašuvdnan.
Loahpas rámiida sámediggeráđđi Muotka erenoamážit Vuotnasiidda skuvlla dan buori barggu ovddas maid skuvla lea bargan oktonas vuolleahkásaš dorvoohcciid ektui geat vázzet skuvlla doppe.