- Resolušuvdnašiehtadallamat loahpahuvvojedje maŋŋebárgga njukčamánu 6. b., ja dál leat stáhtat soahpan resolušuvdnateavstta álgoálbmotnissoniid dili ektui, dadjá ráđđelahttu Vibeke Larsen.
ON nissonkommišuvnna olis lea dál vuosttaš gearddi šiehtadallojuvvon sierra álgoálbmotnissonresolušuvdna. Dát lea iešalddis deaŧalaš lávki rivttes guvlui. Sámediggi barggai árjjalaččat resolušuvdnateavsttain.
Nissonkommišuvnnas eai lean nu galle álgoálbmotnissona mielde, ja dušše soapmásis lei vejolašvuohta searvat, ja lei váikkuhanfápmu šiehtadallamiidda. Sámediggi bealuštii ahte lea dárbu nannet álgoálbmotnissoniid dili ja váikkuhanfámu nissonkommišuvnnas, ja lea dovddahan stáhtaide ahte lea dárbu nannet álgoálbmotnissoniid vejolašvuođa ja váikkuhanfámu kommišuvnnas.
-Resolušuvnnas deattuhuvvo dasto man deaŧalaš lea ollásit ollašuhttit álgoálbmotnissoniid ja –nieiddaid vuoigatvuođaid, nugo oahpahusa, ja ovdánahttit máŋggakultuvrralaš lagadeami oahpahusvuogádagas – dainna lágiin ahte álgoálbmotnissoniid erenoamáš mihttomearit ja dárbbut váldojuvvošedje vuhtii, dadjá Larsen.
Deattuhuvvo ahte álgoálbmotnissoniid árbedieđut leat deaŧalaččat álgoálbmotservodaga ovddideami oktavuođas. Resolušuvnnas deattuhuvvo ahte álgoálbmotnissoniid ferte atnit árvvus, ja ahte sin olmmošvuoigatvuođaid ferte ollásit čađahit. Veahkaváldi álgoálbmotnissoniid vuostá lea okta máŋgga beliin mii deattuhuvvo resolušuvnnas, ja ávžžuhuvvo ahte stáhtat álggahit doaibmabijuid maiguin dáistalit veahkaválddi vuostá, riikkaid dásis ja báikkálaččat. Resolušuvnnas ávžžuhuvvo stáhtaid doarjut álgoálbmotnissoniid searvama boahttevaš álgoálbmogiid máilmmikonferánssas, mii galgá dollojuvvot 2014:s.
-Sámediggi áigu boahtteáiggis árjjalaččat bargat dan ala vai álgoálbmotnissonfierpmádat ON nissonkommišuvnnas ásahuvvošii ja nannejuvvošii, dadjá ráđđelahttu Vibeke Larsen loahpas.
Loahpalaš resolušuvdnateavsttas ávžžuhuvvo earret eará stáhtaid álggahit sierra doaibmabijuid maid bokte ovdánahttit ja nannet politihka ja prográmmaid maiguin sihkkarastit álgoálbmotnissoniid searvama almmolaš mearrádusproseassain.
Oktavuohtaolmmoš: ráđđelahttu Vibeke Larsen, tlf. 941 30 116