Konsultasjon Balsfjord-Skaidi - signert protokoll.pdf 1,05 MB
Sámediggeráđđi lea konsultašuvnnain Oljo- ja energiijadepartemeanttain válljen ahte ii áiggo vuosttaldit ođđa 420 kV fápmolinnjá huksema Báhccavuonas Skáidái, dainna vuordámušain ahte departemeanta dál lea válljen vuoruhit dán sisabahkkema ovddabeallái eará huksemiid seamma guovlluin.
Dát konsešuvdnaášši guoská hui stuorra sisabahkkemii sámi guovllus ja galgá lágiduvvot čađa muhtun dain deaŧaleamos boazodoalloguovlluin Norggas. Boazodoallofágalaš árvvoštallamat ja konsultašuvnnat mat leat čađahuvvon orohagaiguin, čájehit ahte linnjá negatiiva váikkuhusat šaddet noađđin guoskevaš sámi beroštumiide.
Linnjá guoská maiddái ollu kártejuvvon sámi kulturmuittuide dán guovllus.
Loga eanet dás: http://www.sametinget.no/index.php/Miljoe-areal-og-kulturvern/Kulturminner/Mange-nye-samiske-kulturminner-mellom-Balsfjord-og-Hammerfest
Lasiha elfápmosihkkarvuođa
-Sámediggeráđđi lea válljen dohkkehit ahte lea duohta dárbu lasihit fápmosihkkarvuođa ja ahte dát linnjá sihkkarasttášii elfámu álbmogii Romssa ja Finnmárkku fylkkain, dadjá sámediggepresideanta Aili Keskitalo.
Sámediggeráđđ áigu ovddidit ášši meannudeapmái Sámedikki dievasčoahkkimii njukčamánu álggus dainna evttohusain ahte dohkkehuvvo dat konsultašuvdnaboađus mii lea juksojuvvon Oljo- ja energiijadepartemeanttain.
-420 kVfápmolinnjá lea stuorra ja viiddes sisabahkken. Danne dát lea stuorra ja váttes ášši sámi servodahkii. Linnjá huksen boahtá lassin ovdalis sisabahkkemiidda. Go sámediggeráđđi dál dattetge mieđiha dán huksemii, de lea ággan vuosttažettiin dat ahte dat sihkkarastá fápmolágideami, dadjá Keskitalo.
Eanet gáržžidusat
-Sámediggeráđđái lea čielga eaktun dat ahte viiddes sisabahkken dás mearkkaša ahte guovddáš eiseválddit boahtteáiggis gáržžidit sakka addimis lobiid eanet noađuheaddji sisabahkkemiidda seamma guovlluin. Dát guoská erenoamážit eará stuorra huksemiidda, nu go bieggamillopárkkaide, dadjá sámediggepresideanta Aili Keskitalo.
Sihkkarstá viidáset váikkuhanfámu
Sámediggái lea leamaš deaŧalaš ahte sámi vuoigatvuođaeaiggádat leat beassan searvat plánaproseassaide gulahallamiid ja konsultašuvnnaid bokte. Gulahallan lea seamma deaŧalaš viidáset plánemis ja ieš huksenáigodagas. Plána galgá ráhkaduvvot birrasa, fievrrideami ja huksenbargguid várás (nu gohčoduvvon MTA-plána).
-Konsultašuvnnain mii leat duođalaččat aiddostahttán dan ahte Statnett lea geatnegahttojuvvon uhcidit hehttehusaid boazodollui lagas gulahallama bokte boazodolliiguin. Juohke láhkai galget váldit vuhtii boazodoalu ja iešguđet orohagaid áigodatgeavaheami, loahpaha sámediggepresideanta Keskitalo.
Eanet dieđuid addá Sámedikki presideantarAili Keskitalo, 971 29 305
Trasékart_Alta_kommune.pdf 4,02 MB
Trasékart_Balsfjord_kommune.pdf 5,12 MB
Trasékart_Kvalsund_kommune.pdf 3,71 MB
Trasékart_Kvænangen_kommune.pdf 4,24 MB
Trasékart_Kåfjord_kommune.pdf 4,18 MB
Trasékart_Nordreisa_kommune.pdf 4,41 MB
Trasékart_Storfjord_kommune.pdf 4,84 MB