Gonagaslaš Majestehta Gonagas. Gudnejahttojuvvon guossit.
Sámi giellavahkku lea lihkostuvvan hui bures, ja miehtá riikka leat leamaš doalut dán vahkus. Mun lean leamaš ollu doaluin dán vahkus, ja mun gal rámohalan hui sakka dainna maid mii ovttas leat bargan sihke gávpogiin, suohkaniin, giellaguovddážiin, skuvllain ja mánáidgárddiin.
Mus lea illu beassat čalmmustit Sámedikki vuosttaš Giellaloktenbálkkašumi. Giellavahku oktavuođas almmuhii Sámediggeráđđi gieskat sierra Giellaloktenbálkkašumi, mii galgá geigejuvvot ásahussii, organisašuvdnii dahje searvái mii beaivválaččat čalmmustahttá ja geavaha sámegiela.
Go áigemearri dievai, de leimmet ožžon 24 árvalusa. 18 iešguđetlágan ásahusa/organisašuvnna/searvvi árvaluvvoje oažžut bálkkašumi. Buot árvalusat ledje buorit, ja loktejit sámegiela servodagas iešguđetgeládje. Sámediggeráđđi mearridii njuolggadusaid vuođul gii oažžu Giellaloktenbálkkašumi. Ovdal go muitalan masa juolludit bálkkašumi, de háliidan giitit buohkaid geat sáddeje midjiide árvalusaid. Lea somá oaidnit dan stuora beroštumi, ja ahte oallugat leat mielde lokteme sámegielaid árvvu servodagas.
Vuoiti lea ovddidan sámegielaid beaivválašgiellan sihke čálalaččat ja njálmmálaččat oallugiidda, ja erenomážit nuorat olbmuide. Vuoitis leat čuovvut/geavaheaddjit miehtá sámi ja juohke agis. Doppe leat olbmot geat juogadit iešguđetlágan dieđuid ja áššiid, ja doppe gullo sámegiella juohke beaivve, ii dušše davvisámegiella, muhto eará sámegielat maiddái. Vuoiti lea veahkehan ollu olbmuid duostat sámástišgoahtit, maiddai almmolaččat.
Giellageavaheaddjit leat ieža ásahan dán fálaldaga, sii jođihit dan ieža áibbas nuvttá. Dat čájeha min mielas dan stuorra dáhtu ja ráhkisvuođa sámegielaide mii min álbmogis lea. Mii eat leat vuollánan. Min gielat leat ain eallimin, vaikko leat ollu roasuid čađa mannan. Mii háhkát ođđa giellaarenaid, maiddái digitála máilmmis. Vuoiti maid doarju eará oasi min kultuvrras; njálmmálaš muitalanárbevieru. Mii beassat oahpásnuvvat iešguđetge guovlluin Sámis, iešguđetge sámi eallimiidda ja servodagaide. Min mielas dat maid govve sámi servodaga girjáivuođa.
Somás ja guoimmuheaddji govaiguin, teavsttaiguin ja gulahallamiin lea sámegiella šaddan oassin sosiála mediain mii leavvá viidát. Nuorat ja earát, geat minddar eai soaittáše sámegiela gullat ja sámegillii gulahallat árgabeaivvis, leat ožžon kanála gos dát lea vejolaš. Dát hutkás giellabargi, guhte ásahii dán vejolašvuođa, hutkkai johtti sámegielat gulahallanreaiddu.
Vuoiti lea Snaepmie, sámegielat Snapchatkonto, mii čalmmustahttá ja ovddida sámegielaid beaivválaččat. Snaepmies postejit sihke nuorat ja rávisolbmot, beakkálmasat ja dábálaš olbmot, miehtá Sámi. Sii čállet ja hupmet iežaset sámegillii, ja lea hui somá oaidnit iešguđetlágán eallinmuitalusaid. Mun rámidan daid olbmuid geat dustet nu rahpasit sihke čálalaččat ja njálmmálaččat čájehit iežaset eallima ja dan bokte nu bures loktejit sámegielaid.
Bálkkašupmi lea 30.000 ruvnno ja dáiddadiploma man Iŋga-Wiktoria Påve lea ráhkadan.
Bivddán de Snaepmie álggaheaddji; Ánne Márjá Guttorm Gravena boahtit váldit vuostá bálkkašumi maid Gonagaslaš Majestehta dás geige buot Snaepmie geavaheddjiide ja guldaleddjiide.
Dáiddadiploma man Iŋga-Wiktoria Påve lea ráhkadan