Mii áigut ságastallat, dalle go sámediggeráđđi ovddida čilgehusa sohkabealdásseárvvu birra dievasčoahkkimii boahtte vahkus, veahkaválddi birra nissonolbmuid vuostá, sohkabealidentitehta ja rabasvuođa birra seksuála soju ektui sámi servodagas. Ráđđelahttu Henrik Olsen háliida eanet rabas, gierdavaš ja searvvaheaddji sámi servodaga.
- Sámediggeráđđái lea deaŧalaš ahte sámi servodat ja sámi oktasašvuohta leat rahpasat, gierdavaččat ja searvvaheaddji. Ollu daid áššečuolmmaid birra mat čatnasit sohkabeallái, dásseárvui ja sodjui sáhttá leat váttis hállat. Dan maid vuosttamužžan fertet dahkat lea oažžut dáid áššiid politihkalaš agendai, cealká ráđđelahttu Olsen.
Čilgehusas ovdan buktojuvvojit iešguđege suorggit main sohkabealli sáhttá leat dásseárvvu hehttehussan, nugo veahkaváldi nissonolbmuid vuostá, sohkabealidentitehta ja seksuála sodju.
- Veahkaváldi nissonolbmuid vuostá lea máilmmiviidosaš váttisvuohta, ja mis ii leat makkárge sivva jáhkkit ahte sámi servodagas livččii dilli earálágan. Identitehta sohkabeali ektui lea nanus sámi servodagas ja sáhttá leat váttis hilgut dán sohkabealnorpma. Muhtumiin lea ain váttis dohkkehit ahte ráhkistit seamma sohkabeale olbmo. Buot dát hehtte duohta sohkabealdásseárvvu, cealká Henrik Olsen.
Minoritehta minoritehta gaskkas
Čilgehusas boahtá ovdan ahte lesbbat, homofiillat, bifiillat ja guovttesárgálaš olbmot sámi servodagas leat minoritehtat minoritehta siste ja ahte ollugat vásihit vaši ja jaskatvuođa jos sii háliidit boahtit oidnosii.
Ráđđelahttu Henrik Olsen doaivu ahte eanet rabasvuohta sohkabealidentitehta ja seksuála soju ektui sámi servodagas dagahivččii ahte gierdavašvuohta buorránivččii.
- Sámi servodagas galgá leat sadji buohkaide ja galggašii leat iešalddis čielga ášši ahte sáhttit ráhkistit ovtta beroškeahttá sohkabealis, almmá ahte vašuhuvvot ja váldošeimmet vuostá jaskatvuođain. Mii fertet maiddái duostat hástalit tabuáššiid sohkabealidentitehta oktavuođas vai sáhttit ovddidit servodaga viidáseappot.
Čilgehus galgá leat vuođđun dásseárvodoaibmaplánii ja doaibmabijut galget searvvahuvvot Sámedikki jahkásaš bušeahtaide.
Čilgehusa čuovvoleapmin áigu sámediggeráđđi geassemánus doallat seminára lesbbaid, homofiillaid, bifiillaid ja guovttesárgálaš olbmuid birra sámi servodagas.
Oktavuohtaolmmoš:
Sámediggeráđđi Henrik Olsen, tel. 907 75 219