– Mii fertet buktit sámi buktagiid eanet earáge olbmuid olámuddui, go čájehuvvo ahte lea dárbu. Dasto galgat mii juohkit máhtu sámi kultuvrra birra, dadjá sámediggeráđđi Silje Karine Muotka.
Arena gos čájehit sámi design
Šoop Šoop - Sámi Design Days bistet guokte beaivvi. Vuosttaš beaivvi, guovvamánu 4. beaivvi, deaivvadit sámi designerat ja buvttadeaddjit ostiiguin mat leat bivttasmohtabuvddat, interiørfitnodagat, galleriijat, museat jna. Nuppi beaivvi, guovvamánu 5. beaivvi, deaivvadit sámi fitnodagat kunddáriiguin.
Dát lea buvttadeddjiid arena, gos čájehit márkaniid mat mannet guhkkelii go báikkálaš márkanat geaidda eanemusat vuvdet, ja rahpat vejolašvuođa ahte eanet olggobealde Sámi oaidnigohtet sámi dávviriid eanet go dušše gávttiid ja niibbiid. Kunddáriin lea vejolašvuohta gávppašit sámi buktagiid maid váillahit olggobealde turistabuvddaid, gos dat dávjá vuvdojuvvojit juovlanigáid ja stáluid gaskkas.
– Dat go čohkkejuvvojit buorit buktagat sámi designmeassuide gos oastit ožžot erenoamáš vejolašvuođa ovtta beaivvi, ja dábálaš olbmot nuppi beaivvi, lea hui buorre go jurddašit máilbmái olaheami iežas buktagiiguin. Deaŧalaš lea ahte sámi designerat/duojárat válljejit dihtomielalaččat gos ja guđe oktavuođain čájehit iežaset buktagiid, dadjá duojár Ove Stødle Billávuonas.
Buktit sámi buktagiid eanet olámuddui
Dan seammás go sámi gullevašvuohta ahtanuššá fárrolaga sámi kultuvrra eanet dohkkehemiin ja lea eanet oidnosis, erenoamážit TV:s ja musihkkalávddis, de ahtanuššá maiddái čeavláivuohta guoddit sámi identitehtadovdomearkkaid nugo biktasiin, čiŋain dahje stohpogálvvuin.
– Lea paradoksa ahte báikkálaš sámi designeriid ja buvttadeddjiid kvalitehtabuktagat Norggas eai leat olámuttus álbmogii ja buvddaide miehtá riikka. Dál lea duođai áigi ásahit ámmátlaš arena man bokte sámi design ja kvalitehtaduodji boahtá olámuddui buot buvddaide ja ostiide, dadjá sámediggeráđđi
Silje Karine Muotka.
Galgá addit máhtu ja áddejumi
Šoop Šoop 2020 galgá maiddái váikkuhit dan ahte buvttadeaddjit ja oastit ožžot máhtu sámi identitehta ja kultuvrra hálddašeamis gávpeoktavuođas.
Dát mearkkaša dan ahte ferte leat áddejupmi das ahte sámi kulturdovdomearkkat galget ovddiduvvot gudnejahttimiin, ovdamearkka dihtii ahte árbevirolaš gávttit čuvvot bearraša ja kulturgullevašvuođa, go fas sámi designobjeavttat nugo šearffat, biktasat ja čiŋat leat buohkaid olámuttus. Dat galgá addit máhtu buvddaide ja ostiide, geat soitet ballat oastimis sámi dávviriid go ballet dahkamis juoga “boastut”, seammás go dat galgá maid váikkuhit dasa ahte sámi designbuvttadeaddjit galget rámisvuođain sáhttit oaidnit iežaset gálvvuid geavahuvvot kulturrájáid rastá.
Sámediggi lea bivdán Árvu, Være ja Kreativ Industri ovddidit Šoop Šoop 2020. Dáin fitnodagain lea nana faggi sihke designfágas ja lea nana gullevašvuohta sámi identitehtii ja kultuvrii.
Eanet dieđuid oaččut, váldde oktavuođa:
Sámediggái sámediggeráđiin Silje Karine Muotka, mob. 984 87 576, dahje ráđđeaddiin Kirsten Østby, tel 78 47 41 08
Duojár Ove Stødle: 993 46 286