Sámediggeráđi lahttu Ellinor Jåma lea garrasit hirpmástuvvan cealkámušaid ja konklušuvnnaid geažil maid Norgga luonddudutkan instituhta dutki Torkild Tveraa ja ráđđehus leat buktán bohccuid jápmima ja boraspiriid gaskasaš oktavuođa birra.
Son reagere garrasit erenoamážit daid čuoččuhusaide ahte boazodoallit mahkáš divttášedje nealgut bohccuideaset jámas ja de dan maŋŋá bonjadit boraspirebuhtadusaid.
-Dát ii leat etihkalaččat dohkálaš ja lea hui imaš go dutki addá čiegus čuoččuhusaid gielisteami birra ja ahte boazodoallit mahkáš dihtomielalaččat divttášedje nealgut elliid, raporttas mii galggašii leat dieđalaš boraspiriid mearkkašumi birra bohccuid jápmimii. Raporta mas várra čilgejuvvo dušše oassi boazodoalu duohtavuođas, dadjá Sámediggeráđi lahttu Ellinor Marita Jåma.
Norgga luonddudutkan instituhta dutki Torkild Tveraa ovddidii ovddit vahkus raporttas movt boraspiret váikkuhit bohccuid jápmimii. Tveraa oaivvilda ahte boraspiriin ii leat nu stuorra váikkuhus bohccuid buvttadeapmái ja jámolašvuhtii. Raporta lea čalmmustuvvon sierra mediain, ja Jåma illá jáhkká maid oaidná, go leat ollu generaliseren ja liiggástallan, sihke Tveraa ja ráđđehusa ovddasteddjiid beales.
-Sihke stáhtaráđđi Bård Vegard Solhjell ja politihkalaš ráđđeaddi Audun Garberg leaba cealkán kategoralaččat raportta kvalitehta birra. Dasa ii leat dattetge makkárge sivva. Mis lea ođđa dutkan sihke Norgga ja Ruoŧa bealde, ja leat logut Boazodoallohálddahusas ja earáin mat addet siva bidjat gažaldatmearkka dán raportta eavttuide ja konklušuvnnaide, deattuha Jåma.
Jåma deattuha ahte son háliida eanet go mielas ságastallat rahpasit boazodoalu ceavzilvuođa birra, boraspirehálddašeami ja eará rámmaid birra go guoská ceavzilis boazodollui Norggas boahtteáiggis, ja son mieđiha ahte boazolohku ja guohtonvuođđu fertejit leat maid mielde dán ságastallamis.
-Muhto mii eat dohkket dakkár konklušuvnnaid maid ráđđehus okto mearrida, ja mat vel leat vuođđuduvvon dutkamii mii ii doala duohtavuođa ektui ja ideologalaččat. Ságastallamis boazodoalu ceavzilvuođa birra fertejit leat mielde buot relevánta bealit ja duohta fakta. Dalle fertejit maiddái ráđđehusa iežas plánat boazoguohtonguovlluid gáržžidemiid ja lihkahallamiid birra servodathuksema, johtalusa ja ruvkeindustriija geažil váldojuvvot mielde.
Gulahalli
Sámediggeráđi Eillinor Marita Jåma, tel. +47 916 13 460
Eambbo dieđut
- Björnpredation på ren - pdf (2012)