Dáhpáhus čohkkii ollugiid geat ásset sullos. Sámedikki presideanta Aili Keskitalo, Romssa fylkkasátnejođiheaddji Knut Werner Hansen, Návuona sátnejođiheaddji Eirik Losnegaard Mevik, Eva Walderhaug Riikaantikváras ja ollu eará oasálastit bohte fanassáhtuin.
Rahpan čađahuvvui brukkas Dunluovttas. Maŋŋá čájehii Jan Isaksen oasi kulturbálgás Rappvik rájes. Doaluid loahpas ledje mállásat ja musihkka.
Sámediggepresideanta Aili Keskitalo ja Romssa fylkkasátnejođiheaddji Knut Werner Hansen rahpaba kulturbálgá
Kulturmuitosuolu
Sámedikki presideanta Aili Keskitalo dajai rahpansáhkavuorustis ahte suolu lea okta fiidnámus kultureanadagain mat mis leat, ja ieš kulturmuitosuolu.
– Lei stuora vásáhus fitnat Spittás vuosttaš geardde, ja oahppat eanet lagas ja gáidan historjjá birra. Ávžžuhan eambbosiid fitnat Spittás vásiheame erenoamáš kultur- ja luonddubirrasa, dadjá Keskitalo.
Sullos lea ollu juovvaeana. Doppe gávdnojit guovžahávddit, eamihávddit ja bálvvosgeađggit. Dán eanadagas oaidnit geainnu ovdal risttalašvuođa sámi oskkoldahkii. Hávddit várra biddjojuvvojedje juvvii dan dihtii vai jábmi sáhtii vádjolit eatnanvuloš jábmiidmáilbmái. Bálvvosgeađggit sihkkaraste oktavuođa ipmiliid máilbmái buori bivddu ja guollelihku doaivvuin. Guovža lea leamaš sámiid bassi ealli ja hávdáduvvui danne nugo olbmuidge lávejedje hávdádit.
Geađgeáiggi duktásadji
Dološ hávdi Spittás, sihkarastojuvvon neahtain
Romssa fylkkasátnejođiheaddji Knut Werner Hansen čilgii movt olbmot leat ássan ja eallán Spittás máŋga duhát jagi. Dáppe leat viežžan birgejumi luonddu riggodagas: guollebivdu, fuođđut, muorjjit ja eatnama šattuin.
Son muitalii maiddái dan stuorra duktásaji birra Spittás mii čájeha ahte juo geađgeáiggis leat leamaš stuorra fatnasat. Ráktoroggit sullos geavahuvvojedje fális- ja njuorjjooljju dahkamii. Olju lei gávpegálvu ja geavahuvvui sihke čanastagaid nannemii, oljolámppáide ja borramuššii.
Báikkálaš bargu
Sihke Sámedikki presideanta ja fylkkasátnejođiheaddji leigga giitevaččat ja hirpmástuvvan báikkálaš áŋggirdemiid ektui kulturmuittuiguin Spittás. Báikkálaš áŋggirdeapmi váikkuha buori gáhttema nu ahte kulturbiras dikšojuvvo maiddái boahtteáiggis.
Kulturdiehtaga professor Ivar Bjørklund dajai sáhkavuorustis ahte su oktavuohta Spittái manná máŋga logijagi maŋos guvlui áiggis. Sus lea viessu sullos mii geavahuvvo viššalit. Dasa lassin lea son váikkuhan sullo kultureanadaga dovddusin dahkama go jahkásaččat fitná universitehta studeanttaiguin doppe.
Šiega dálkeipmilat
Dálkedieđáhus áittii orkánain eahket beallái. Lihkus čájehedje dálkeipmilat buori beali alddiineaset. Go leimmet vázzimin de gahčče vuosttaš arvečalmmit. Guossit ledje movtta go maŋŋá mátki besse čákŋalit lieggasii Roy Isaksena lusa ja ožžo ruovtturáhkaduvvon biergomáli.
Liv Rundbergas ledje musikála bottožat. Son lávllui dološ sámi lestadiánalaš sálbmateavsttaid maid lei čohkken Gáivuonas. Dasa lassin ovdan buvttii son muhtun oasi Nils Aslak Valkeapää árbbis.
Kulturbálgá ofelastin