Sámediggi joatká ain 2015: juohkit stipeanddaid ohppiide geain lea sámegiella fágan joatkkaskuvllas. Ođas 2015:s lea ahte maiddái oasseáiggeoahppit, geain lea sámegiella fágan, sáhttet ohcat stipeandda ja ahte stipeandda máksomearri lassána.
Ođđa máksomearit leat ná:
o Stipeanda ohppiide geain lea sámegiella vuosttašgiellan: 7 500,- ruvnno
o stipeanda ohppiide geain lea sámegiella nubbingiellan: 5 500,- ruvnno
o Stipeanda ohppiide geain lea sámegiella vierisgiellan: 3 000,- ruvnno
-Mii háliidit ahte eambbogat ohppet sámegiela. Dušše ná sáhttit mii sihkkarastit ahte giella seailu viidáseappot ja boahtte buolvvat sáhttet dan oahppat. Danin sávvat mii ahte stipeanda movttiidahttá eambbosit válljet sámegiela joatkkaskuvllas, lohká sámediggepresideanta Aili Keskitalo.
-Maŋimus jagiid lea ohppiid lohku joatkkaskuvllas geain lea sámegiella fágan, lasánan. Dát sáhttá čájehit ahte stipeanda movttiidahttá ohppiid válljet sámegiela, ja dat lea hui buorre, lohká Keskitalo.
Ohcama skuvlajahkái 2014/2025 sáhttá sáddet ođđajagimánu 15.b. 2015 rájes. Ohcamat meannuduvvojit dađistaga. Ohcamat mat sáddejuvvojit maŋŋil njukčamánu 15.b.2015 eai meannuduvvo.
Ohcanskovi gávdná Sámedikki neahttasiidduin álggus ođđajagimánu 2015 rájes.