-Buorre strategiija davviguovlluid várás ferte ráhkadit lagas ovttasráđiin singuin geat ásset davvin, dadjá Silje Karine Muotka, sámediggeráđđi geas lea ovddasvástádus earret eará ealáhusain.
- Lea boaresáigásaš, badjelgeahččanvuohta ja uhccán movttiidahtti bidjat ovdan dakkár strategiija mii ii válde vuhtii min geat ássat dáppe davvin. Dasa lassin ii leat strategiijas mihkkege ođđasiid, muhto lea viehka heajos máŋggus ovddeš davviguovlostrategiijain, dadjá Muotka.
-Dál mii leat gullan nationála politihkalaš strategiijaid min ruovttuguovlluid várás fargga logi jagi. Ovddit strategiijat gal ledje vel ráhkaduvvon muhtun muddui ovttasráđiid davviguovlluiguin, dadjá Muotka.
Ceavzilis áŋgiruššamat
-Mii diehtit ahte ráđđehussii lea deaŧalaš áŋgiruššat mineráladoaimmaiguin, vaikke vel bohtet ge raporttat heajos gánnáheami ja ekonomalaš hástalusaid birra suorggis. Danne dat lea heajos strategiija áŋgiruššat nu garrasit ođđa mineráladoaimmaid álggahemiin vaikke vel leat ge stuorra biraslaš hástalusat ja heajos gánnáheapmi márkaniin, dadjá Muotka.
Son deattasta ahte davviguovlluid biras lea rašši, ja dálkkádatrievdamat čuhcet čielgasepmosit dáppe davvin.
- Ná garra áŋgiruššan dakkár ealáhusaiguin main leat nu stuorra birasváikkuhusat, lea hui váralaš, ja seammás mii diehtit ahte dát doaimmat eai ollašuhte álbmotrievttálaš standárddaid álgoálbmotvuoigatvuođaid ektui. Dan sáhttá ráđđehus rievdadit dainna lágiin ahte sihkkarastá sihke etihkalaš ja biraslaš rámmaeavttuid minerálalágas. Dat attášii einnostanvejolašvuođa buohkaide, lohká sámediggeráđđi.
Muotka oaivvilda ahte strategiija davviguovlluid várás ferte buorebut vuođđuduvvot eanet ceavzilis áŋgiruššamiidda, nu go innovašuvdnii, máhttui, smávvafitnodagaide, mátkeeallimii ja báikkálaš borramušbuvttadeapmái. Su mielas dárbbašuvvo maid ovttasbargu rájáid rastá.
- Dakkár áŋgiruššamiid sáhttit mii buohkat doarjut, ja dat heivejit dasa ahte ovddidit dan ealju maid ráđđehus ohcala.
Sámediggeráđđi Muotka oaivvilda maiddái ahte eaktun buori ealáhusstrategiijii lea ahte dat váldá vuođu dain álbmogiin mat ásset davvin ja das mas sii ellet dál. Nuppi bealis čađahuvvo dakkár aktiiva politihkka man ulbmil lea unnidit boazodoalu, guolástusa ja eanadoalu, nuppi bealis fas deattuhuvvo earret eará minerálaealáhus dat mii galgá beastit min.
- Gosa bat šattat dat duohta áŋgiruššan árktalaš eanadoaluin mii namuhuvvui ráđđehusa prinsihppaprográmmas, muhto mii vajálduvai ovdalgo jahki lei vássán dan rájes go ráđđehus heaittihii dán áŋgiruššama eanadoallošiehtadallamiin? Guolástusain lea maid dieđihuvvon dakkár politihkka mii duođas unnidat doaimmaid Davvin, dan sajis go ovddidit guolástusaid nu ahte dat šaddet okta dain deaŧaleamos ealáhusain dáppe Davvin.
Davvin leat dakkár buorit ja gelbbolaš fámut go fylkkagielddat, Sámediggi, fylkkamánnit, máhttobirrasa, ealáhusorganisašuvnnat ja báikkálaš ealáhusoassálastit mat sáhttet leat mielde bures vuođđuduvvon ovddidanbargui Davviguovlluid várás ja ovttas Davviguovlluiguin. Danne ferte ávžžuhus ráđđehussii leat ahte mii čoahkkanit ráhkadit ceavzilis strategiija boahtteáiggi várás, loahpaha Muotka.