Várrepresideanta Laila Susanne Vars lea duhtavaš go Máhttodepartemeanta lea mearridan ođđa láhkaásahusa mánáidgárdeoahpaheddjiidoahpu rámmaplánaid birra.
Konsultašuvnnaid bokte leat ráđđehus ja Sámediggi soahpan ahte ođđa mánáidgárdeoahpaheddjiidoahpus galgá biddjojuvvot eanet deaddu dan áddejupmái ahte sámi kultuvra lea deaŧalaš oassin nationála kultuvrii Norggas. Viidáseappot galget mánáidgárdeoahpaheaddjit dovdat álgoálbmogiid stáhtusa ja sin vuoigatvuođaid riikkalaččat ja riikkaidgaskasaččat.
- Lea buorre go boahttevaš mánáidgárdeoahpaheaddjit ožžot eanet máhtu dan guovtti stáhtakonstitueren álbmotčeardda birra Norggas, dadjá Sámedikki várrepresideanta Laila Susanne Vars.
Máhttolokten mánáidgárdeoahpaheddjiidstudeanttaid várás lea čuovvoluvvon mánáidgárdeoahpaheddjiidoahpu nationála láhkaásahusa mearkkašumiin, ja viidáseappot dain nationála njuolggadusain mat leat láidesteaddjin dasa mo juohke ásahus dan galgá váldit mielde fágaplánaidasas.
Sámediggeráđđi lea duhtavaš go mii konsultašuvnnaid bokte sáhttit váikkuhit dasa ahte eanet ja eanet oahput ožžot láhkaásahusa mii fuolaha sámi oainnu oahpuin ja ahte dat boahtá ovdan juohke oahppoásahusa fágain ja prográmmaplánain. Lea hui deaŧalaš dan mihttomeari ektui ahte buot studeanttat Norggas galget oažžut dárbbašlaš máhtu sápmelaččaid birra álgoálbmogin, ahte mánáidgárdeoahpaheddjiidstudeanttat ožžot sihke eanet máhtu sámi kultuvrra, historjjá ja servodateallima birra ja besset dainna oahpásmuvvat.
- Buot mánáin lea vuoigatvuohta dásseárvosat ohppui. Sámi mánáide mearkkaša ollu ahte sii besset oahpásmuvvat iežaset kultuvrii mánáidgárddis juo, ja eará mánáide lea deaŧalaš oažžut máhtu sámi diliid birra nu árrat go vejolaš. Máhttu lea čoavdda lotnolas árvvusatnimii ja gierdevašvuhtii, ja máhtu bokte mii hukset šalddiid kultuvrraid gaskii Norggas, dadjá Sámedikki várrepresideanta Laila Susanne Vars.
Gulahalli:
Várrepresideanta Laila Susanne Vars, tlf. 977 54 102