– Jovsset Ánte lea nuorra áhčči, gii máŋga jagi lea šaddan dáistalit iežas rievtti ovddas beassat boazodoaluin eallit ja birget. Ferte leat lossa noađđi sutnje, go vuos vuoitá sihke diggegottis ja lágamánnerievttis, ja de vuoittáhallá Alimusrievttis. Lea máŋgii váibmui čuohcan oaidnit su riektelanjas gávttiin, nuorra, njuolggočielggát, geas lea boahtteáiggi doaivva, muhto liikká lea árpmitmeahttun riektevuogádagas mii lea huksejuvvon earáid riekteáddejumi vuođul, dadjá Keskitalo.
Sámediggi áigu dál vuđolaččat lohkat duomu, vai sáhttet árvvoštallat mii sáhttá dahkkot áššis, sihke rievttálaččat ja politihkalaččat.
– Lea áibbas čielggas ahte boazodoallolágas fertejit máŋga beali ollislaččat árvvoštallot. Sámediggi lea várren 500 000 ru dán bargui 2018:is, dadjá Keskitalo. Dát galgá dahkkot ovttas Norgga Boazosápmelaččaid Riikkaservviin.
Jearahallamiid oktavuođas sáhttá sámediggepresideanta Aili Keskitalo oažžut ságaide mobiilas: 97129305