Sámedikki presideanta Aili Keskitalo deaivvada bearjadaga 17.10.14 ođđanammaduvvon sámi giellalávdegottiin sin vuosttáš čoahkkimis Oslos. Presideanta illuda deaivat lávdegotti lahtuid ja mieđiha ahte sus leat stuorra vuordámušat dasa maid lávdegoddi sáhttá ollašuhttit.
- Lávdegotti bargu lea deaŧalaš ja dárbbašlaš. Munnje lea lunddolaš searvat lávdegotti vuosttáš čoahkkimii. Mii galgat ovttas rahčat sámegiela boahtteáiggi ovddas, cealká presideanta Keskitalo.
Son čujuha viidáseappot dasa ahte servodat lea ovdánan dan rájes go Sámelága giellanjuolggadusat vuosttaš geardde mearriduvvojedje ja ahte dál lea áigi guorahallat daid lágaid, doaibmabijuid ja ortnegiid mat čatnasit sámegillii.
- Mus lea stuorra jáhkku dasa ahte giellalávdegotti čielggadeamis leat máŋga doaibmabiju mat sihkkarasttášedje ja nannešedje sámegielaid boahtteáigái, cealká presideanta Keskitalo.
Sámediggepresideanta háliida ahte sámegielat galget geavahuvvot, gullot, oidnot ja ovddiduvvot, ja ahte boahtteáiggis láhččojuvvo dasa ahte buohkat geat dan háliidit, galget oažžut vejolašvuođa oahppat sámegiela.
- Háliidan ahte váhnemiin galgá leat vejolašvuohta fievrridit giela viidáseappot iežaset mánáide ja ahte láhččojuvvo dasa ahte sámegielat fálaldagat leat fidnemis mánáidgárddis, skuvllas ja astoáiggis. Giela boahtteáigái livččii mávssolaš ahte giella geavahuvvo ja oidno olggobealde ruovttu.
Sámedikki álgga
Sámediggi lea guhká oaidnán dárbbu sihkkarastit ovttaskas olbmo vuoigatvuođa beassat geavahit sámegiela árgabeaivvis ja válddii dan oktavuođas álgaga dasa ahte nammaduvvo giellalávdegoddi mii dainna bargá.
Lávdegoddi galgá árvvoštallat buriid čovdosiid mat dahket bargguid álkibun ja váldet vuhtii gielddaid hástalusaid ja dárbbuid. Lávdegoddi galgá deattuhit dakkár ortnegiid ja doaibmabijuid mat sáhttet dagahit ahte eanebut ohppe ja geavahit sámegielaid, ja mii dainna lágiin sihkkarastá gielddaide ja earáide geat fállet bálvalusaid, bargiid geain lea máhttu sámegielain.
Lávdegoddi galgá geiget čielggadusas maŋimusat guovvamánu 15. b. 2016.
Loga eanet: Lávdegoddi galgá nannet sámegiela
Gulahalli:
Presideanat Aili Keskitalo, tel. 971 29 305