Sámi našuvnnalaš gealboguovddáš - psyhkalaš dearvvašvuođasuddjen (SÁNAG)sáhttá dál fállat buhcciidbálvalusaidis ja bagadallama buhcciidbálvalusas olles riikii.–GoSÁNAG dál fállá bálvalusaidis olles riikii, de dat lea sámi dearvvašvuođafálaldaga nannen masa mii sávvat buresboahtima, dadjá sámediggeráđđiHenrik Olsen.
Sámediggi ja Dearvvašvuoođa- ja fuolahusdepartemeanta lea konsultašuvnnaid bokte soahpan nannet nationála fálaldaga sápmelaččaide spesialiserejuvvon gárrenfuolahusas ja psykiatriijas. Buot riikka regionála dearvvašvuođadoaimmahagat galget dál dahkat ovttasbargošiehtadusa Davvi Dearvvašvuođain RHF ja SÁNAG:in dikšunfálaldagas iežaset sámi buhcciid várás.
– Lean hui duhtavaš go SÁNAG dál lea formálalaččat dohkkehuvvon našuvnnalaš gealboguovddážin psyhkalaš dearvvašvuođasuddjemis ja gárremis. Dat mearkkaša ahte doppe gos eai leat šat báikkálaš fálaldagat, sáhttá sámi buohcci oažžut iežas dikšundárbbu duhtaduvvot SÁNAG bokte, dadjá ovddasvástideaddji sámediggeráđđi Henrik Olsen.
Dikšunfálaldat sámi buhcciide nannejuvvo eanet dakko bokte ahte Davvi Dearvvašvuohta RHF dál lea ožžon bargun ruhtadit ja čađahit vuosttaš lávkki nationála birrajándor dulkonbálvalusa oččodeamis dearvvašvuođasuorgái. Dát lea Davvi Dearvvašvuođa áigodaga 2010-2013 sámi gáiddusdulkoma regionála geahččalanprošeavtta čuovvoleapmi. SÁNAG lea maid dahkan ovttasbargošiehtadusa Jämtland län:in Ruoŧa bealde nannen dihtii psyhkalaš dearvvašvuođasuddjema lullisápmelaččaid várás Ruoŧas.
– Mu mielas dát doaibmabijut leat hui deaŧalaččat, ja lea maid lávki dan guvlui ahte ásahit boahttevaš sámi dearvvašvuođapárkka mii ođđaáiggi teknologiijain sáhttá fállat spesialiserejuvvon dearvvašvuođabálvalusaid iežas báikkálaš guovllu olggobeallái ja Norgga olggobeallái dárbbu mielde, deattuha Olsen.
Gulahalli
Sámediggeráđi Henrik Olsen, tel. +47 907 75 219