Mii leat dakkár dilis Deanu leagis mii lea mannan boasttuguvlui guhkit áiggi, go turistaoaggun Suoma bealde lea lassánan badjel mearálaččat. Boađusin das lea ahte báikkálaš olbmot goappašiid bealde rádjačázádaga vásihit ahte eai beasa árbevirolaš oaggunsajiide.
- Suoma oaggunturismma ovdáneapmi Deanus ii leat dohkálaš ja dat čuohcá báikkálaš olbmuid oaggumii, dadjá sámediggeráđđi Silje Karine Muotka. Son doarju Deanu ja Kárášjoga sátnejođiheddjiid oainne das ahte báikkálaš olbmuide ii leat ávkin dakkár šiehtadus gaskal Norgga ja Suoma mii ii doaimma.
- Mu oaidnu lea ahte sámi servodahkii sihke Norgga ja Suoma bealde ii leat dát ovdáneapmi buorre, dadjá Muotka. Sámedikki bealis áigut mii dál nannet min oktavuođa Suoma bealde Sámedikkiin dás áššis, ja min oainnu mielde lea deaŧalaš báikkálaš olbmuide sihkkarastit dakkár ortnegiid mat fuolahit oaggunvuoigatvuođa ja beassama ieš oaggumii dakkár dilálašvuođain goas lea deaŧalaš fuolahit máddodaga. Ođđa, buoriduvvon šiehtadus ferte čuovvut álbmotrievtti ja nationála rievtti, dadjá Muotka.
Sámediggi lea mielde šiehtadallansáttagottis, ja Muotka vuordá dál sáttagotti loahpalaš rávvagiid.
In oainne ahte midjiide lea ávkin dát šiehtadus jus eai oainne ahte lea vejolaš juksat ođđa, buoriduvvon šiehtadusa mii fuolaha báikkálaš olbmuid biehttalkeahtes oaggunvuoigatvuođaid čázádagas ovdal áigemeari 2016:s, dadjá Muotka gii áigu ovddidit ášši meannudeapmái sámediggeráđis dalán go Norgga sáttagoddi lea almmuhan iežas rávvagiid.