Gieskat gulaimet ahte Justiisa- ja gearggusvuođadepartemeanta ii šat gáibit sámegielat operatevrraid Finnmárkku 110-guovddážii. Dát bistá dassážiigo politiija lea guorahallan iežaset ođđasisorganiserema. Ráđđelahttu Henrik Olsen mielas dat buktá dárbbašmeahttun eahpedorvvu álbmogii.
- Mii leat vásihan fuolastuvvama go eai šat gáibiduvvo sámegielat operatevrrat Finnmárkku 110-guovddážii dál. Mun lean maid fuolastuvvan. Dat buktá stuorra váttisvuođa go sámegielhálli olmmoš čuojaha heahteguovddážii ja áddejuvvo boastut, dahje go eai fáhte rivttes sámi báikenama, cealká ráđđelahttu Henrik Olsen.
Olsen háliida rámidit sihke Finnmárkku 110-guovddáža ja sámi gielddaid buollinhoavddaid go čalmmustahttet sámegiela geavaheami heahteetáhtain. Son oaivvilda ahte dat lea boktán stuorát fuomášumi guovddáš eiseválddiid bealis.
Sámediggi diehtá ahte heahtedieđihanbálvalusa boahttevaš organiseren lea čielggaduvvon ja galgá meannuduvvot lagas boahtteáiggis, ja ádde maid dan ahte guovddáš eiseválddit eai háliit álggahit ođđa doaibmabijuid ovdalgo dat lea sajis.
- Vaikke vel eiseválddit eai háliit čađahit ođđa doaibmabijuid dál, de mii eaktudit ahte heahtedieđiheamit sáhttet dahkkojuvvot sámegillii dohkálaččat dassážiigo ođđa čoavddus boahtá. Sámedikki bealis mii áigut maiddái gozihit ahte sámegiella váldojuvvo vuhtii heahteetáhtaid boahttevaš organiseremis, loahpaha Olsen.