Norgga áigodatraporterema oktavuođas ON mánáidkonvenšuvnna čuovvuleamis, lea Sámediggi sádden dievasmahtti raportta ON mánáidvuoigatvuođakomiteai.
Genève válddii Sámediggi maid ovdan dan duođalaš hástalusa mii sámi mánáin lea go leat mánáidsuodjalusa fuolahusas ja go dat leat erenoamáš rašis joavku, de eai álo biddjojuvvo biebmoruovttuide main lea máhttu sámi giela ja sámi kultuvrra birra. Sámediggi muitalii hástalusaid birra mat sámi bálvalusfálaldagas leat, earret eará dan geažil go váilot ollu sámegielat bargit sihke dearvvašvuođasuorggi, mánáidgárddiid ja skuvlla siskkobealde. Dasto raporterii Sámediggi ahte lea stuorra dárbu dutkat fáttáid nugo givssideami, veahkaválddi ja psykalaš ja fysalaš dearvvašvuođa, vai dieđášeimmet makkár doaibmabijuid berrešii álggahit.
Sámediggi oaččui maiddái vejolašvuođa hállat birasváikkuhusaid birra maid guolástusealáhusas ja boazodoalus vásihit ruvkedoaimma geažil sámi guovlluin, ja ahte sámi boazodoalloguovllut gártet gillát birasáddjás energiijaávkkástallama ásahemiin nugo biegga- ja čáhcefápmorusttegiid geažil. Dát čuohcá sámi mánáid bajásšaddaneavttuide negatiivvalaččat.
Čoahkkimis ledje Redd barna, Mánáidkonvenšuvdna Foruma, Mánáidáittardeaddji, Norgga nationála olmmošvuoigatvuođaásahusa ja Sámedikki ovddasteaddjit.