Válgakoarttas leat dieđut dan birra guđe válgalanja don galggat geavahit válgabeaivvi dahje galggat go jienastit ovddalgihtii dán jagi, ja gosa jienastat galgá sáddejuvvot.
Sámediggeválgga válgakoarta lea alit. Sii, geain lea jienastanvuoigatvuohta stuorradiggeválgii, ožžot maiddái vilges válgakoartta. Sáhtát jienastit goappašiin válggain.
Dán jagi lea dat ođas, ahte dain gielddain/suohkaniin, main leat uhcit go 30 čáliheami Sámedikki jienastuslogus 2011 muttus, GALGET olbmot jienastit ovddalgihtii. Dáin gielddain/suohkaniin ii leat válgadiggi. Geahča listta mii čájeha guđe gielddaide/suohkaniidda dat gusto dás:
Dáppe sáhtát jienastit sámediggeválggas.
Go jienastat ovddalgihtii, de sáhtát jienastit vaikke guđe gielddas/suohkanis riikkas. Sáhtát dieđusge maiddái jienastit iežat ruovttugielddas/-suohkanis. Ovddalgihtii jienasteapmi álgá sisriikkas 12.08.2013. Sáhtát jienastit ovddalgihtii gitta bearjadaga rádjai ovdal válgga, muhto du ovddasvástádus dat lea ahte jienastit nu árrat ahte jienastat olle sisa maŋimusat vuosárgga 09.09.2013 dii. 21.00.
Váldde fárrui válgakoartta go galggat jienastit. Dat álkidahttá válgabargiid barggu ja dahká ahte don beasat jođáneappot jienastit. Vaikke vel vajálduhtát ge dahje láhpát válgakoartta, de beasat liikká jienastit. Gielddat/suohkanat sáhttet čálihit ođđa válgakoartta iežaset vuogádaga bokte, dahje čállit gieđain. Jus ii leat ožžon válgakoartta sámediggeválgii poasttas ja oaivvildat ahte don leat čálihuvvan Sámedikki jienastuslohkui, de váldde oktavuođa Sámedikkiin.
Válgakoartta ii sáhte geavahit legitimašuvdnan. Dus galgá leat dohkkehuvvon legitimašuvdna lassin.
Jus dus leat eará gažaldagat válgakoartta birra, de váldde oktavuođa Sámedikkiin.