Sámediggi bovdejuvvui Deanučázádaga guolástanhálddahusa (DG) stivračoahkkimii borgemánu 14. b. Leavvajohkii. Sámedikki presideanta Egil Olli mieđihii boahtit čoahkkimii mas áššin ledje vuolláičálaáŋggirdeapmi DG stivrra vuostá ja Deanuláhkaásahusa guorahallan. Čoahkkimii serve maiddái Kárášjoga gielda, Deanu bivdiid- ja guolástussearvi ja Deanučázádaga luossabivdosearvi.
- Mii leat aiddo ožžon báikkálaš ja vuoigatvuođavuđot hálddašeami. Ii dat hirpmástuhte ahte váldá áiggi ovdalgo buot lea sajis. Lean dattetge veaháš fuolastuvvan váilevaš gulahallama geažil gaskal hálddahusa ja luossabrevaeaiggádiid, cealká Egil Olli.
Sámedikkis lea leamaš dehálaš rolla das ahte oažžut ásahuvvot bálkkálaš hálddašeami Deanučázádahkii mas hálddašanorgána oaččui dan válddi mii ovdal lei fylkkamánnis ja politimeaštáris. Čoahkkimis digaštallojuvvui earret eará sierramielalašvuohta das ahte gii dat sáhttá bovdet luossabrevaeaiggádiid oktasaščoahkkimii.
- Eahpitkeahttá dat lea DG gii sáhttá bovdet oktasaščoahkkimiidda. Dát lea oassi váldesirdimis politimeaštáris DG:ii. Dattetge lea gažaldat goas ja mo lea jierpmálaš gulahallat luossabrevaeaiggádiiguin go sii leat čázádaga vuoigatvuođaeaiggádat. Oktasaščoahkkin lea buorre vuođđun gulahallamii luossabrevaeaiggádiiguin, oaivvilda sámediggepresideanta.
Lea deaŧalaš ahte DG barggus lea buorre báikkálaš vuođđu. Hálddašeamis earáid bealis čuovvu stuorra ovddasvástádus. Maiddái vejolašvuohta lonuhit stivralahtuid lei deaŧalaš fáddán čoahkkimis.
- Stivralahtut eai berre heaitit hui deaŧalaš sivaid haga. Luohttámuša huksen lea buohkaid ovddasvástádus ii ge dat mearkkaš dan ahte lea ovttamielalašvuohta buot mearrádusain, oaivvilda Egil Olli.
DG lea nuorra organisašuvdna, mas leat stuorra bargamušat boahtteáiggis. Sámediggi bargá ovttas DG:iin earret eará dan Norgga šiehtadallansáttagottis, mii galgá šiehtadallat ođđa soahpamuša guolásteamis riikkarájás.
- Mun ávžžuhan buohkaid ovttas doarjut min oktasaš luossaresurssa hálddašeami. Jeavddalaš gulahallan dárbbašuvvo ja doaivvun ahte bealit farggamusat čoahkkanit bargat daid hástalusaiguin mat das leat, loahpaha Sámedikki presideanta Egil Olli.
Oktasašcealkámuš maid DG lea sádden:
Deanučázádaga guolástanhálddahus – DG – lágidii diehtojuohkinčoahkkima borgemánu 14. b. 2012 Leavvajogas báikkálaš hálddašeami ja stivračoahkádusa birra. Čoahkkimii serve Sámedikki presideanta Egil Olli, Kárášjoga sátnejođiheaddji Anne Torill E. Balto ja Deanučázádaga luossabivdosearvvi ja Deanu bivdiid- ja guolástussearvvi ovddasteaddjit.
Čoahkkima cealkámuš:
Deanučázádaga guolástanhálddahusa stivra lea ovttas bovdejuvvon gussiiguin čoahkkimis borgemánu 14. b. 2012 Leavvajogas digaštallan dan dili mii lea čuožžilan Deanučázádaga stivračoahkádusa ja hálddašeami oktavuođas. Álggahanmuttus lea stivra oanehis áiggis čađahan sihke hálddašandoaibmabijuid ja eará gáibideaddji doaibmabijuid. Okta dán barggu eavttuin lea buorre gulahallan guoskevaš beliiguin ja ahte barggus lea buorre báikkálaš vuođđu.
Lea šállošahtti go leat čuožžilan iešguđet oainnut gaskal hálddahusa ja bivdovuoigatvuođaorganisašuvnnaid, ja ahte ii lea rabas gulahallan beliid gaskkas. Čoahkkinoassálastit oaivvildit ahte goappašiid beliin lea ovddasvástádus deaivvadeamis ja oččodeamis buriid čovdosiid.
Oktavuođaolmmoš:
Presideanta Egil Olli, tlf: 900 26 880.