Innlegg - Audiens på Slottet.pdf 222,24 kB
Várrepresideanta Laila Susanne Vars ja Sámedikki vuorrasiidráđi jođiheaddji Inga Karlsen beassaba deaivvadit Majestehtalaš Gonagasain bearjadaga ođđajagimánu 11. b. 2013.
- Sámediggi háliida čalmmustahttit sámi vuorrasiid eallindili gávpogiin ja giliin, ja danne háliidii Sámediggeráđđi ja Sámedikki vuorrasiidráđđi deaivvadit Majestehtalaš Gonagasain muitalit dan barggu birra maid Sámediggi dál čađaha sámi vuorrasiid ovddas, dadjá Sámedikki várrepresideanta Laila Susanne Vars.
Sámedikki vuorrasiidráđđi ásahuvvui 2012:s ja das leat iešguđet sámi giellaguovlluid ovddasteaddjit.
Sámediggeráđđi háliida deattuhit dan buori barggu mii dál čađahuvvo miehtá riikka sihkkarastin dihtii sámi vuorrasiidda buoret eallindili, vejolašvuođa orrut ruovttus ja vejolašvuođa oažžut bálvalusaid sámegillii boarrásiidsiiddain ja buohcceviesuin.
- Gonagasa viesus lea erenoamáš sadji ollu sápmelaččaid váimmuin, erenoamážit vuorrasiid váimmuin. Gonagas deattuhii ođđajagisártnistis ahte mis lea buohkain ovddasvástádus geavahit resurssaideamet buoremus lági mielde ja doaibmat buoremus lági mielde buorrin oktavuhtii. Sámi vuorrasat leat ge deaŧalaš resursaolbmot sámi servodahkii, sin áŋgiruššan sámi giela ja kultuvrra ovddidemiin lea hui mávssolaš, ja danne illudahttá ge go mii beassat deaivvadit Majestehtalaš Gonagasain, dadjá várrepresideanta Laila Susanne Vars.
Sámediggi lea álggahan máŋga ođđa doaibmabiju dainna ulbmiliin ahte buoridit sámi vuorrasiid eallindili, dás maiddái deaivvademiid sámi vuorrasiid várás, dearvvašvuođa- ja eará bálvalusaid sámegielat vuorrasiid várás, lohkan- ja čállinveahki daid sámi vuorrasiid várás, geat eai hálddaš dárogiela ja dorjon deaivvadanbáikkiid sámi mánáid ja vuorrasiid várás.
- Mii oaidnit hástalusaid muhto maiddái ollu vejolašvuođaid buorideamis fálaldagaid sámegiela vuorrasiidda dahje vuorrasiidda geain lea sámi kulturduogáš, go sii deaivvadit dáža dearvvašvuođalágádusain ja eará almmolaš hálddašemiin mat eai hálddaš sámi giela ja kultuvrra. Min mielas lea hui deaŧalaš ahte buot riikka vuorrasiin, maiddái sámi vuorrasiin, galgá leat gelbbolaš vuorasvuohta, cealká várrepresideanta Laila Susanne Vars.
Gulahallit:
Sámedikki várrepresideanta Laila Susanne Vars, tel. 977 54 102
Sámedikki vuorrasiidráđi jođiheaddji Inga Karlsen, tel. 915 72 720
Innlegg - Audiens på Slottet.pdf 222,24 kB