ON nissonkommišuvnna 57. sešuvnna fáddán lei veahkaváldi nissoniid vuostá. Nissonkommišuvnna čoahkkima ulbmil lei gávdnat čovdosiid dasa mo sáhtášii eastadit veahkaválddi nissoniid ja nieiddaid vuostá. Dál loahppadokumeanta válmmas.
Sámediggeráđi lahttu Vibeke Larsen oassálasttii sešuvnna vuosttáš vahkkui. Larsen lei mielde Norgga sáttagottis, maid mánáid-, dásseárvo- ja searvadahttinministtar Inga Marte Thorkildsen jođihii.
- Mii leat duhtavaččat dainna ahte sešuvnna loahppadokumeanttas lei sierra paragráfa álgoálbmotnissoniid dili birra go guoská veahkaváldái nissoniid ja nieiddaid vuostá. Muhto lea baicce šállošahtti oaidnit ahte ON álgoálbmotjulggaštus ii leat namuhuvvon, cealká ráđđelahttu Vibeke Larsen.
Loahppadokumeanta deattuha ahte veahkaválddis nissoniid ja nieiddaid vuostá lea sáhka fámu boasttoanus. Vuođđun dasa lea historjjálaš ja struktuvrralaš erohus fámus gaskal nissoniid ja albmáid.
Álgoálbmotovttasbargu
Sámedikkis lei lagaš oktavuohta eará álgoálbmotnissoniiguin sešuvnnas.
- Dán jagi ledje ollu álgoálbmotnissonat čoahkkimis ja dollojuvvojedje juohke beaivvi iđitčoahkkimat daid álgoálbmotnissoniid várás, geat ledje doppe. Ovttas mii ovddideimmet oktasaš cealkámuša mas álgoálbmotnissoniid hástalusat veahkaválddi ektui váldojuvvojedje ovdan, ja ávžžuhus buot stáhtaide ahte čađahit doaibmabijuid mat hehttejit veahkaválddi álgoálbmotnissoniid ja –nieiddaid vuostá, cealká ráđđelahttu Vibeke Larsen.
Sámediggi áigu čuovvolit sešuvnna barggu earret eará prošeavtta bokte veahkaválddi birra lagaš gaskavuođain sámi servodagas, ja čoahkkimiid bokte Ráđđehusain ja earáiguin. Sámediggi áigu maiddái bargat dan ala ahte ovttasbargu álgoálbmotnissoniid gaskkas riikkaidgaskasaččat formaliserejuvvo.
Sáttagotti sáttasátni
Norgga sáttagotti sáttasátni lei čielggas ja oaččui fuomášumi dán jagi CSW:s.
Oktavuohtaolbmot:
Ráđđelahttu Vibeke Larsen, tel. 941 30 116.