Sámediggeráđđi lea dál meannudan buot dán jagi giellaprošeaktaohcamiid. Mii leat juolludan doarjaga oktiibuot 42 giellaprošektii miehtá riikka. –Midjiide bohte ohcamat badjelaš 17,2 miljon ru ovddas mii iešalddis muitala ahte mii leat gártan vuoruhit čavgadit doaibmabijuid gaskka. Dán jagi, nie movt ovddit jagiin ge, leat mii ožžon ollu buriid ohcamiid, cealká ráđđelahttu Ellinor Marita Jåma.
Prošeaktadoarjja lea juolluduvvon badjelaš 8 miljon ru ovddas ja dán jagi leat vuoruhan doarjaga ovddideapmái, jorgaleapmái dahje applikašuvnnaid heiveheapmái sámegillii, mii lea ođas.
Ođđa giellaarenat
Ráđđelahttu Jåma deattuha man deaŧalaš lea bisuhit sámegiela ealli giellan, mii geavahuvvo beaivválaš arenain gos olbmot leat.
- Sámegiela geavaheami nannema oktavuođas lea deaŧalaš maiddái ahte sámegiella biddjojuvvo digitála máilmmi olámuddui. Danne leat mii válljen earret eará addit doarjaga sámegielat spealuid ovddideapmái mánáide ja nuoraide, ja dasto leat addán doarjaga sámegielat mátkeplánejeaddjái ”Neste Avgang Sápmi”. Goappašagat leat dakkár reaiddut maid sáhttá geavahit árgabeaivvis ja maid sáhttá geavahit nuvttá jierbmetelefovnnaide ja neahttabreahtáide.
Dán jagi leat juolludan 1,5 miljon ru applikašuvnnaid ovddideapmái sámegillii. Oktiibuot ožžot 9 prošeavtta doarjaga Sámedikkis.
Mánáid ja nuoraid gielladikšun
Dasa lassin go Sámediggi eanet áŋgiruššá sámi applikašuvnnaiguin, de áigut maiddái nannet giela guovlluin gos sámegiella dál lea eanetlogu giella ja lea beaivválaččat anus.
- Hui suohtas lea go Guovdageainnu suohkan dál oažžu oktiibuot 500 000 ru giellabeasi lágideapmái mánáid ja nuoraid várás. Guovdageainnus leat ollu mánát geain sámegiella lea vuosttašgiellan, muhto dattetge lea dárbu nannet ja viidáseappot ovddidit sin giela, cealká ráđđelahttu Jåma.
Dasto čujuha son ahte Sámedikkis leat ge danne vuordámušat ahte dát váikkuha positiivvalaččat mánáid ja nuoraid giellagáhttemii Guovdageainnus.
Dasa lassin lea Sámediggi addán doarjaga Árran julevsámi guovddážii badjel 800 000 ru giellaleairraid lágideapmái mánáid ja nuoraid várás. Dát giellaleairrat galget heivehuvvot sierra ahkásaš mánáide ja iešguđege giellamáhtu ektui.
Gulahallanolmmoš:
Ráđđelahttu Ellinor Marita Jåma, tel. +47 916 13 460