Sámediggeráđđi lea meannudan 2012 giellaohcamiid. Bohte Ohcamat badjel 16 miljon ru ovddas, ja bušeahttarámma lei sullii 9 miljon ru. – Sámediggeráđđi lea hui duhtavaš go nu ollu ohcamat leat boahtán iešguđet lágán giellaprošeavttaide, dat čájeha ahte leat ollu áŋgiruššamat sámegielaid nannema ja ovddideami oktavuođas, cealká Sámediggeráđi lahttu Ellinor Marita Jåma.
- Go ledje nu ollu ohccit, de lea issoras garra bargu vuoruhit ollu buriid ohcamiid gaskka. Sámediggeráđi mielas lea leamaš deaŧalaš vuoruhit dakkár doaibmabijuid mat nannejit sámegielaid geavaheami, ja doaibmabijuid mat erenoamážit leat ávkin mánáide ja nuoraide, deattasta Sámediggeráđi lahttu Jåma viidáseappot.
Mátta- ja julevsámegielat guovddážis
Sámediggeráđi lahttu Ellinor Marita Jåma mielas lea hui illudahtti go bohte doarjjaohcamat giellabargui eanaš guovlluin Sámis.
- Go Sámediggeráđđi ain deattuha ovddidit mátta- ja julevsámegielaid, de illudahttá dat go bohtet dađistaga eanet ohcamat mátta- ja julevsámi guovllus, dadjá ráđđelahttu Jåma.
Ođđa teknologiija geavaheapmi sámegiela ovdánahttimii ja nannemii
Dán jagi lea addojuvvon doarjja ollu prošeavttaide mat áigot ovddidit applikašuvnnaid buot golmma sámegillii, ja maid sáhttá geavahit mobiltelefovnnain ja neahttabreahtain. Ohcamat dákkár prošeavttaide eai leat ovdal boahtán. Go leat applikašuvnnat mobiilas ja lohkanbreahtas, de sáhttá oahpahallat ođđa sániid ja geahččaladdat iežas sámegielmáhttu.
- Sámediggeráđi mielas lea deaŧalaš geavahišgoahtit ođđa teknologiija sámegielaid nannemii ja suodjaleapmái. Čájeha ahte olbmot liikojit hui bures geavahit applikašuvnnaid giellaoahpahusas. Go dál ovddiduvvojit applikašuvnnat sámegielaide lea juoga maid mii ilus doarjut dadjá Sámediggeráđi lahttu Ellinor Marita Jåma.
Doarjja lea addojuvvon maiddái jietnasátnelista applikašuvnnaide, dat leat dárogillii ja máttasámegillii, dárogillii ja julevsámegillii ja dárogillii ja davvisámegillii. Sátnelisttat galget ráhkaduvvot mobiilatelefovdnii ja neahttabreahttai, ja dat leat heivehuvvon máŋggalágan joavkkuide. Dát veahkeha sin, geat háliidit oahppat sámegiela. Sátnelisttain leat sánit ja daid mearkkašumit. Daid sáhttá geavahit maiddái veahkkin riektačállimii buot golmma sámegillii.
Giellaarenat ja giellaleairrat
Dán jagi nugo maiddái diibmá lea ohccojuvvon ruhta easkkaálgi kursii sámegielas, joatkkakursii, giellalávgumii ja giellabeassái mat leat heivehuvvon sihke nuoraide ja rávisolbmuide.
Doarjja lea maiddái addojuvvon sierra ohcamiidda maid ulbmilin lea ovdánahttit sámegielaid máŋgga arenas ja ođđa giellaarenain.
- Giellaarenat leat deaŧalaččat sámegielaid nannen- ja ovddidanbarggus. Mánát, nuorat ja rávisolbmot dárbbašit arenaid gos besset gullat giela ja geavahit dan, dát guoská erenoamážit dakkár guovlluide gos giella lea leamaš rašši. Sámediggi lea vuoruhan giellalávgumiid ja giellabeasiid doarjuma, ja go dađistaga eambbogat ohcet doarjaga dán lágan leairraide illudahttá. Čájeha ahte dán lágan doaibmabijuin lea buorre beaktu ja danne lea Sámediggeráđđi hui movtta go ohcamat leat lassánan, cealká Sámediggeráđi lahttu Ellinor Marita Jåma loahpas.
Gulahalli:
Ráđđelahttu Ellinor Marita Jåma, tlf. 916 13 460.